Бөгүн, июль 2-де, ТР-ниң Чазак Даргазының албан-дужаалын түр үеде күүседип турар Владислав Ховалыг коронавируска удур бирги тарылганы алган. Россияның президентизи Владимир Путинниң «Спутник V» вакцина-биле тарыткан дуржулгазын үлегерлеп, Владислав Ховалыг шак ындыг вакцина-биле тарыттырган. Ол вакцина организимни вирустан элээн үр үе дургузунда камгалаар дугайында Россияның президентизи тарыткан соонда чугаалап турган.
Владислав Ховалыгга ковидке удур тарылганы Республиканың дугаары 2 поликлиниказынга салган. Эмчилер дарганы тарыыр мурнунда, аңаа вакцинаның кылып бүдүрген хуусаазын көргүзүп, таныштыргаш, ук вакцина-биле тарыткан соонда, организм ону чиик хүлээп алырын чугаалааннар. Ол ышкаш, тарылга кылган черни эге дээрезинде дырбавас, аңаа сүг дээртпес, каш хонук чунар-бажың, саунаже кирери хоруглуг боолурун кичээндиргеннер. Оон аңгыда аар ажыл кылыры күзенчиг эвес дээрзин Владислав Ховалыгга эмчилер сүмелээн.
#ВакцинаСпутникV#ВладиславХовалыг#Ковидкеудуртарылга#Тывадаковидкеудуртарылга#Шынсолун #Тыва #Тывамедээ #Тывадыл #Тывамедиагрупп #Тува #Tuva #Shyntuva