Рубрикалар

“ОМИКРОНГА” ЧЕРЛЕ АЛЫСПААЛЫ!

Хөй салып турар айтырыглар болгаш чондан кирген хомудалдарны эдери-биле хемчеглер:

24 шак эрткенде ПЦР-анализтер чүге чок болуп турар?

ТР-ниң Кадык камгалал яамызы ПЦР-анализиниң харыызын саадатпазы-биле лабораторияларны хондур ажылдаар режимче киирген. ПЦР –анализин республика девискээринде дөрт лаборатория кылып турар:

  1. Республиканың халдавырлыг аарыглар эмнелгезиниң лабораториязы;
  2. Республиканың кеш болгаш шээр аарыглар диспансериниң лабораториязы;
  3. Барыын-Хемчик кожууннуң төп эмнелгезиниң лабораториязы;
  4. Чөөн-Хемчик кожууннуң төп эмнелгезиниң лабораториязы.

Аарып турар улус эмчиниң бижии-биле анализти поликлиникага азы бажыңынче эмчи чалааш, дужаап болур. Аарыг улустуң чанында кады чурттап турар азы ажылдап турар улустарда аарыгның даштыкы демдээ илеревээн болза,  олар анализ дужаавас. Оон аңгыда, аарыг улус-биле дорт харылзажып турган-даа болза, коронавируска удур тарыдып алган хамаатылар санитар-эпидемиологтуг негелделерни шыңгыы сагып, эрги режиминге ажылдаар, эмнелге хуудузун ындыг улуска биживес.

Төлевирлиг анализти Республиканың кеш болгаш шээр аарыглар диспансериниң лабораториязынга, СПИД төвүнге болгаш хуу лабораторияларга дужаап болур.

Анализ дужаар дээн улустуң оочурун эвээжедири-биле немелде пунктулар ажыдарын шиитпирлээн. Бо хүннерде Күрүне филармониязының оран-савазынга анализ хүлээп алыр пунктуну тургузары-биле белеткел ажылдарын кыла берген. Чаа технологияның тускай эмчи дузазын алыры-биле республикадан дашкаар чоруур дээн улуска, уруглар садында дежурный бөлүктерге ажы-төлүн тургузар дээн  ада-иелерге болгаш өске-даа чөптүг чылдагааннарлыг улуска ПЦР анализи дужаарынга эптиг ногаан зоналарны поликлиникаларда организастап турар.

Call- төпче чүге долгап чадап турар?

122 дугаарлыг телефонче хөй кижи долгап турар болганда, телефон шугуму өйлеп-өйлеп эмин эрттир чүдүрлү бээр. Ынчангаш точкаларны улам көвүдеткен. Covid-19 –ка удур эмнээшкин болгаш диагностиканың амбулатория төвүнде 3-тен 15 чедир телефон-биле медээ хүлээп алыр оператор точкаларын немээн.  Ол ышкаш уруглар эмнелгезинде -3, Кызыл кожууннуң төп эмнелгезинде 5 точканы немээн.Оон аңгыда, Кызылдың поликлиникаларында Call- төптерниң база “изиг шугум” телефоннарын хүлээп алыр каналдарны ийи катап улгаттырарын дааскан.

122 дугаарлыг телефонче долгап тургаш, кандыг кнопканы базарын айтып берип турар баш бурунгаар бижидип каан үн дузалакчызының (голосовой помощник) чугаалап турары ёзугаар кылыр.

План ёзугаар ажыл-чорудулгазын чүге соксадып турар?

Чаа коронавирус республика девискээринге хенертен нептерээш, эпидбайдалды нарыыдадып кээрге, эмчилер бүгү күштү аңаа удур мөөңнеп, план ёзугаар ажыл-чорудуун түр када соксадыр ужурга таварышкан.

Амгы үеде Республиканың дугаары бир поликлиниказында, Республиканың уруглар эмнелгезинде, Кызылдың хоорай поликлиниказында план ёзугаар ажылды түр када соксаткан. Кол сорулгазы- эмчи организацияларының иштинге аарыгны таратпазы. Оон аңгыда, Росхереглелхайгааралдың Тывада эргелелиниң санитарлыг негелделерге үндезилээн рекомендациязынга чагыртпас арга чок болгай.

Хоочураан аарыглыг улуска эмчи дузазын дистанциялыг хевирге консультацияларны бээри болгаш бажыңнарынга чедип эмнээр ажыл уламчылап турар. А профилдиг диспансерлер ажылын ол-ла эрги режиминде уламчылап турар.

Эмнерни чүге эвээш берип турар?

Эмнерни аарыг кижиниң байдалын көрүп тургаш, сарыылдыг үлээри көрдүнген. Ынчанмас болза, хөй кижиге эм четпейн барып болур. Аарыгның даштыкы демдээ илеревээн улуска эм бээри албан эвес. А чиик хевири илереттинген улуска, 3 хонуктуң эмнерин бээр. Амгы үеде Чазактың курлавыр фондузундан 43 сая рубльга эмнерни немей садып алыр ажыл уламчылап турар.

 

ТР-ниң Кадык камгалал яамызының медээзи

#Медпомощьвпандемию #Минздрав_Тувы

Предыдущая запись
Чоннуң бодалын билип алыры чугула
Следующая запись
ДЕМНЕЖИР, ДУЗАЛАЖЫР, КАДЫЫН КАМНААР
Меню