Рубрикалар

САНИТАР АВИАЦИЯ 170 УЖУДУУШКУННУ КЫЛГАН

Дүрген эмчи дузазын хөгжүдери — “Кадык камгалалы” национал төлевилелдиң мурнады көөр сорулгаларының бирээзи болур. Эрткен чылын эмнелге организацияларының автопарыгы 20 кезек санитар хөлге немерелделиг болган. Чер кырының хөлгези чедип шыдавас черлерге санитар авиация дүрген эмчи дузазын чедирип турар.

2021 чылдың түңнелдери-биле алырга, санитар авиация Тыва Республикага 170 ужудуушкунну кылган, 342 аарыг кижини, ооң иштинде 77 уругну өскээр көжүрген. Кол нургулайында эмчилер орук-транспорт озал-ондааның түңнелинде бертингеннерни, мээзинче хан чүгүрген аарыг кижилерни, а ол ышкаш берге байдалдыг иштиг-сааттыг херээженнерни дажып-сөөртүп турар.

Ылаңгыя Тожу, Барыын-Хемчик, Тере-Хөл болгаш Мөңгүн-Тайга кожууннарже эмчилер хөй катап ужуп турган. Санавиацияны чүгле аарыг улусту көжүреринге эвес, а бедик мергежилдиг эмчилерни эмчи дузазы хереглеттинген черлерге чедирип турар. Шак ынчалдыр, эрткен чылын Ак-Доавуракка “Тыва даг-дүгү” болбаазырадылга комбинадының оран-савазы буступ дүшкенде, бузундулар адаандан когараан кижилерни уштуп, оларның амы-тынын алыр херекке санавиацияның эмчилер бригадазы киришкен.

Санавиация чүгле регионнуң иштинде эвес, а регионнар аразында ужудуушкуннарны чорудуп турар. Чаңгыс эвес удаа Красноярскиниң, Новосибирскиниң болгаш Томскиниң тускайжыттынган эмнелгелеринден аарыг кижилерни сөөрткен.

А. ХЕРТЕК белеткээн.

Предыдущая запись
ШАГААНЫҢ БҮДҮҮ АЙЫ ЭГЕЛЭЭН
Следующая запись
ХОВУ-АКСЫ СУУРДА СУГ АЛЫР ЧЕРНИҢ ТУДУУН АРА СОКСАТКАН
Меню