Республика школаларының чүс хире доозукчузу шылгалдалар дужаар пунктуга чедерде хем кежер.
Тожу, Улуг-Хем база Каа-Хем кожууннарның чагырга черлери, Тываның Хамааты камгалал база онза байдалдар албанының ажылдакчылары, Россияның Онза байдалдар яамызының Тыва Республикада кол эргелелиниң биче хемчээлдиг суднолар талазы-биле күрүне инспекциязының инспекторлары хем кежер школачыларның айыыл чок чоруун хандырар.
Уругларны аай-дедир сөөртүрүн организастаар автотранспорт айыыл чок чоруктуң негелделеринге дүгжүр ужурлуг. Чижээлээрге, техниктиг байдалы эки, муниципалдыг тургузугларда база республиканың өөредилге черлеринде бар тахографтыг база ГЛОНАСС-тыг болур.
Доозукчуларны аай-дедир аргыштырарынга кывар-чаар материалдарның акшаландырыышкынын тус черниң чагырга черлери харыылаар. Бай-Тайга биле Тожу кожууннарда ол ук айтырыгга аңгылаан акша-хөреңги четпезин Өөредилге яамызы демдеглээн. Ынчангаш ол чарыгдалдарже саң-хөөнү көвүдедирин чагырга черлеринге сүмелээн.
Тыва Республиканың Хамааты камгалал база онза байдалдар албанының ажылдакчылары биле Россияның Онза байдалдар яамызының Тыва Республикада кол эргелелиниң биче хемчээлдиг суднолар талазы-биле күрүне инспекторлары Каа-Хем кожууннуң Көк-Хаак, Сизим, Ильинка, Тожунуң Ырбан, Улуг-Хемниң Эйлиг-Хем суурлардан хем кежир шылгалда дужаап келир доозукчуларның, оларны үдеп чоруур кижилерниң айыыл чок чоруун хандырар хемчеглерни алыр. Ол албан черлериниң ажылдакчылары кежиг бүрүзүнге ажылдаар.
Чагырга даргалары школа директорлары-биле кады ТР-ниң ИХЯ ОШААЧКИ эргелелинче күрүнениң түңнел аттестациязының киржикчилерин сөөртүр автотранспортту үдээр дугайында чагыгны баш бурунгаар киирер. Бир эвес школа автобузу үрели бээр болза, өөреникчилер сөөртүр өске аргаларны өөренип көөр.
