Рубрикалар

ТЫВАДА 422 ФЕЛЬДШЕР БАР

Фельдшерлер дүүн, февраль 21-де, профессионал байырлалын демдеглеп эртирген.

Төөгүден алгаш көөрге, дайын шөлүнге ажылдаан, шериг эмчилер, кезер эмчилерни фельдшерлер деп адаар турган. Амы үеде фельдшерлер дүрген эмчи дузазы чедирер албанда, көдээде фельдшер-акушер пунктуларда, школаларда, уруглар садтарында, вокзалдарда, аэропорттарда ажылдап турар. Фельдшер кижиниң ажылы чымыштыг, берге байдалда кончуг дүрген шын шиитпир хүлээп билири, оларның база бир кол шынары.

Тываның эмнелге албан черлеринде 422 фельдшер, ооң иштинде амбулаторлуг кезээнде — 203, стационарда — 12 кижи ажылдап турар.

Эмчиниң дүрген дуза чедирер бригадазында 199 фельдшер эмчи дузазын чонга чедирип турар.

Дээди категорияның 75 фельдшери, 15 кижи — бирги категорияның, 35-жи — ийиги категорияның фельшерлери болуп турар. Республиканың фельдшер-акушер пунктуларында 84 фельдшер ажылдап турар.

Ырак-узак кожууннарда ФАП-тарга ажылдаары-биле фельдшерлерни хаара тудары-биле Тывага 2021 чылда “Көдээ черниң эмчизи” деп программа ажылдап эгелээн. Ол программа-биле дөрт фельдшер Тожунуң Сыстыг-Хем, Барыын-Хемчиктиң Аксы-Барлык, Кызыл кожууннуң Элегес-Аксы болгаш Кара-Хаак суурларынче ажылдап чоруткан.

Ортумак тускай эртемниг эмчи специалистерин Тывада Республиканың эмчи колледжинде өөредип турар. 2015 чылдан тура республика программазын боттандырары-биле, тус черлерден сургуулдарны келир үеде төрээн суурунга фельдшерлеп ажылдаары-биле белеткеп турар. 2019 чылда баштайгы 12 кижи тускай сорулгалыг программа ёзугаар колледжти өөренип дооскаш, суурларынче ажылдап чоруткан. 2020 чылда шак-ла ындыг программа-биле 6 кижи фельдшерниң дипломун холга алган. Амгы үеде колледжте 37 студент үстүнде адаанывыс программа ёзугаар өөренип турар.

ТР-ниң Кадык камгалал яамызының архивинден чурук.

К.МОНГУШ белеткээн.

Предыдущая запись
Ховар болуушкун
Следующая запись
ТЫВАДА ЭПИДБАЙДАЛ ЧҮГЭЭРТЭЭН
Меню