Рубрикалар

В. ХОВАЛЫГ: ШИЛИЛГЕНИ КЫЛЫП КӨРЭЭЛИҢЕР

Тываның Баштыңының албан-хүлээлгезин түр үеде күүседип турар Владислав Ховалыг республиканың чонун халдавырлыг коронавирус хамчыынга удур тарыдып алырын кыйгырган:

— Коргунчуг хамчыктан аарывас дизе, өй-шаанда тарыдып алыры чугула деп чүвени улус-чон билип эгелээниниң түңнелинде, аарыгның нептерелин чавылдырып шыдаан бис. Ол дээрге тарылганың бадыткаттынган үре-түңнелдииниң көргүзүү-дүр. Эргежок чугула коллективтиг иммунитетти хевирлеп алырывыска-ла, аарыг хөлчок дүрген кызырлып эгелээр.

Тарыдып алган кижи безин ковидтен аарый берип болур деп, эмчилер чугаалап турарлар. Оон туржук ол халдавырның дамчыдыкчызы болуп болур. Ынчалзажок халдавырлыг хамчыктан аараан кижилерниң аразында тарытканнарның саны хөлчок эвээш.

Коргуушкуннар бар дээрзин билип турар мен. Бодум база ооң дугайында эвэш эвес дыңнап келдим. Ынчалзажок шупту чүүлдерни деңзилеп, шилилгени кылып көрээлиңер: өкпени дуй алыр аарыгдан аарыыр бе азы тарыдып алыр бе?

Чуртташтарым, бис эвээш санныг, ынчалза-даа турушкур чоннуң салгалы-дыр бис. Аар-берге төөгүлүг орукту эртсивиссе-даа, эстип-чиде бербейн, бот-тускайлаң чоруувусту, байлак культуравысты кадагалап арттырып ап шыдаан бис. Бөгүн федералдыг эрге-чагырганың деткимчези-биле бис өске сорулганы бодувустуң мурнувуста салган бис – амыдырап-чурттаарының хар-назынын база чоннуң санын көвүдедири болгаш улам ыңай хөгжүүрү. Ону боттандырарда, чүгле күрүне политиказы херек эвес, а кижи бүрүзүнүң хамааты харыысалгазы негеттинер!

Айыылдыг халдавырга удур тарыдып алырынче, боттуң арыг-шевер, халдавырга удур культуразын улам ыңай бедидеринче силерни кыйгырдым. Бодум хуумга хамаарыштыр алырга, тарылганың долу курузун эртим, байдалым эки-дир.

А. ХЕРТЕК белеткээн.

#Вакцинация #Коллективтигиммунитет #Владиславховалыг #Тыва #Тува #Тувамедиагрупп #Тывадыл #Тывамедээ #Tuva #Shyntuva

Предыдущая запись
ТЫВАДАН ДӨРТ БАРААН БҮДҮРҮКЧҮЛЕРИ КИРЖИР
Следующая запись
ХӨМҮР-ДАШ ӨРТЭЭ ӨСКЕРИЛБЕС
Меню