Алдайымны эккелгеш,Таңды, Саян улаштырдым.

Чинагийн Галсан

Алдайымны эккелгеш,
Таңды, Саян улаштырдым.
Хомдумну эккелгеш,
Улуг-Хемге холуштурдум.

Дагга даг уладым.
Сугга суг телидим.
Өгбежээм көрдүм.
Чүс чыл, муң чыл манаан ышкаш,
Манай-манай,
Хөөкүйүм даг-ла болуй берген-дир.

Чыды: муң-муң чылдың доозун, салгыны, шимээни,
Чылыы,
Чымчаа
Дискээннен айдыс алдым.
Биске артырган өнчүзү, чагаазы-дыр.
Бисти манап,
Турары ол-ла-дыр.

***
Хара баарымның ханын,
Ак мээмниң дерин
Харының дылынга сииргеш,
Айның саазынга өпейлээн
Бир тең номнарымны
Ажы-төл кылдыр
Чедип, сүрүп келдим.
Улуг чуртум,
Оран-чай хайырлаңар.
Аът-мал дизе,
Артып, мунуп көрүңер.
Аргасын-хоргасын дизе,
Ожууңарга чергелеп,
Оккулуңар.
Алама-чалама дизе,
Орайыңарга азып,
Чалбарыңар!
Чал кара чажымны
Көгергиже, сыыгыжа,
Чезир чаърт сөөгүмнү
Хээрээже, шаарыыжа
Чүткүп демисежип чорааш,
Бүдүргеним,
Ада-иеге сөңнээн аъш-суксунум,
Алдай чуртка өргээн оваа-саңым,
Бо чайга ыткан чугаа-соодум,
Келир кышка доңурган эът-үүжем ийик.
Арыг дээжизин шыгжаан улуг өөмге дээш,
Тавакка салдым,
Дагшага сөңнедим,
Тутканым бо.
Аъш-чемиңерге амдан немезин,
Аал-чуртуңарга күш кошсун,
Ат-нереңерге дааш катсын,
Аас-кежииңерге хей-аът киирзин!

“Шын” №84 2023 чылдың ноябрь 4