Республиканың Аныяктар херектериниң талазы-биле агентилелдиң удуртукчузу Буян Сонамның Бүгү-российжи Аныяктар хүнүнге тураскааткан хемчеглерни эрттирер хүннү соңгаарладыр дугайында саналын Тываның Баштыңы Владислав Ховалыг деткээн.
Июнь 23-те Арат шөлүнге байырлал хемчеглерин планнаан турган. Айыыл-халап болган черге кандыг-бир хөглээшкинниг хемчег эрттирери таарышпас деп, аныяктарның хөй-ниити каттыжыышкыннары база организаторлар санаан.
Агентилел июнь 23 биле 24 хүннеринде калбак программаны тургускан турган. Кызылдың аңгы-аңгы шөлдеринге, ооң иштинде Арат шөлүнге хемчеглер планнаттынган. Б. Сонам ол хемчеглерни июльдуң 8-те – Россияда Өг-бүле, ынакшыл болгаш шынчы чоруктуң хүнүнде демдеглеп эрттирер саналды киирген.
Июнь 23-те Арат шөлүнге Бүгү-российжи күш-ажыл ярмарказы, «Большая перемена», «Твой Ход», «Росмолодежь.Гранты» деп конкурстар болур турган. Башкының болгаш дагдыныкчының чылынга тураскаадып, Бүгү-российжи аныяктар хүнүнүң арт-объектизин тургузарын, Тываның билдингир блогерлери-биле фан-ужуражылгаларны, тюнингилиг автомобильдер, мотоциклдер, спорткарлар делгелгезин, байырлал концертин болгаш дискотеканы планнаан турган.
Бүгү-российжи күш-ажыл ярмарказындан аңгыда, үстүнде шупту хемчеглер орайтадыр болуп эртер. Республиканың кожууннарында планнаттынган хемчеглер база өске хүнче чыла бээр.
Кызылда Аныяктар ордузунга күш-ажыл ярмарказы ол-ла хүнде болуп эртерин хемчегниң организатору Тываның Күш-ажыл болгаш социал политика яамызы дыңнаткан. Күш-ажыл ярмарказының кожууннарга планнары база өскерилбес.
Июнь 23-те 10.00 шактан 16.00 шакка чедир Аныяктар ордузунга эртер «Россияда ажылдар. Арга-шинектерниң үези» деп Бүгү-российжи күш-ажыл ярмарказы Кызылда ажыл дилекчилерин манаар.
Агентилел аныяктар хүнүнге тураскааткан хемчеглерниң соңгаарлаткан үезиниң дугайында тодаргай медээни немей дыңнадыптар болган.