Сентябрь 25-27 хүннеринде Туркестан хоорайга Делегей чергелиг «Voice of Turan» казах ыры фестивалы болуп эрткен. Аңаа Тываның алдарлыг артизи, В. Көк-оол аттыг Национал хөгжүм-шии театрының артизи Аржаана Стал-оол киришкеш, үшкү черге төлептиг болган.
Бо чылын фестивальга Ватикан, Сан-Марино, Венесуэла, Бразилия, Мексика, Белоруссия, Армения, Болгария, Индонезия, Италия, Грузия, Франция, Тунис, Куба, Кыргызстан, Башкортостан болгаш Карачаево-Черкесиядан ыраажылар киришкен.
Ук фестивальды 2020 чылдан тура эрттирип эгелээн. Ооң кол-ла сорулгазы – казахтарның ырлаар уран чүүлүн делегей чоннарынга таныштырары болуп турар. Делегейниң аңгы-аңгы чурттарындан чыглып келген ыраажылар казах улустуң ырларын болгаш боттарының чогааткан ырларын күүсеткеш, казах артистер-биле ийиниң ырызын база ырлашкан.
“Ол хире хөй чурттардан келген шыырак артистер аразынга үшкү черни ээлээни дээрге – улуг тиилелге-дир! Аржаана Стал-оолга ооң тура-соруу, үндүрген күжү, бодунуң сагыш-сеткилиниң эң-не ханызындан үнген бодалдарын ыры-хөгжүм дамчыштыр кижилерге чедирип шыдапканы дээш четтирдивис” деп В. Көк-оол аттыг Национал театрга демдеглээн.
/ Бистиң корр.
Медээ болгаш чуруктарны ТР-ниң Культура
яамызындан алган.