2024 чылда республиканың хоорай, суурларынга чаагайжыттынган хөй-ниити девискээрлери тыптып келир. Ону боттандырар дээр болза, тус черниң чурттакчы чону “Таарымчалыг хоорай хүрээлеңин хевирлээри” төлевилелге идепкейлиг киржир болза эки.
Чаагайжыдар хөй-ниити девискээрлерин шилиир онлайн-бадылаашкын апрель 15-те эгелээн. 17.gorodsreda.ru федералдыг шөлчүгешке эртер рейтингилиг бадылаашкын май 31-ге чедир уламчылаар.
Республиканың шупту кожууннары бо чылын боттандырар күзелдиг төлевилелдерин белеткээн. Идип үндүрген 69 бот-идепкейден 30 төлевилел федералдыг деткимчени алыр. Ынчангаш 14 хардан өрү назылыг республиканың 51500 хире чурттакчызы боттарының үнүн шилип алган девискээри дээш бээр ужурлуг.
2022 чылда база бо төлевилелге Тываның чурттакчы чону эки киришкен. Эрткен чылын хөй үн алган девискээрлерниң чаагайжыдылгазы бо чылын эгелээн.
“Таарымчалыг хоорай хүрээлеңин хевирлээри” төлевилел кожуун, суурларда кандыг боттанып турарын көрээлиңер. Бир-ле дугаар Тес-Хем кожуундан эгелеп аалы.
Тес-Хем кожууннуң чагырга даргазының амыдырал-хандырылга талазы-биле оралакчызы Бэла Суван бо төлевилелдиң куратору.
– Эрткен чылын бистиң кожуунга девискээр чаагайжыдар 3 төлевилел киришкен. Ооң аразындан Берт-Даг сумузу эң-не хөй үннү алган. Сууру чаагайжыттынып, ооң девискээринге спортчу шөл турзун дээш, берт-дагжылар эң-не идепкейлиин көргүскен. Бо чылдың апрель 1-ден Берт-Даг суурда спортчу шөл тургузар ажылдар эгелээн.
Спортчу шөлдүң тудуг ажылдарын хуу сайгарлыкчы Болат Самбуунуң бригадазы хүлээнип алган. Бо хүннерде ук девискээрге тургузар «Алдын Ак-Бедик» деп улуг бижимелдиң демирлерин каңнаар ажылдар чоруп турар. Аңаа тургузар спортчу дериг-херекселди чагыдып каан. Чаа спортчу шөл август 15-те ажыглалга кирер – деп, Бэла Каадыровна чугаалаан.
Апрель 15-тен эгелээн бадылаашкынга тес-хемчилер дыка идепкейлиг киржип турар дээрзин Бэла Каадыровна дыңнаткан. Волонтерлар хөй чон чыылган черлерге бадылаашкын ажылын идепкейлиг чорудуп турар, ынчангаш бо хүнде ниитизи-биле 332 кижи бадылапкан.
Бо чылын база Тес-Хем кожуундан 3 төлевилел киржип турар.
Бир дугаар төлевилел – Самагалдайга Ч. Кидиспей аттыг паркты чаагайжыдары. Кожуун төвүнде чайгаар бүткен чараш парк чоннуң ынак дыштаныр чери. Ооң девискээринге улуг хемчеглер эрттирер сцена, дыштаныр сандайлар, уруглар дыштаныр зона, сайгарлыкчыларга садыг-саарылга чорудар чер турар.
Дараазында база-ла Берт-Даг сумузунуң Кидиспей кудумчузунга хөй ажыл-чорудулгалыг девискээр тургузар. Аңаа спортчу болгаш уруглар ойнаар шөлдер, сесерлик турар.
Үш дугаары, Белдир-Арыг сумузунуң чурттакчы чонун хаара тудар улуг спортчу шөл. Аңаа футбол, хол бөмбүү, баскетбол, бадминтон, шыдыраа ойнаар, маргылдаалар эрттирер шөлдер турар.
Төрээн кожуун, суурунга чаагайжыттынган чараш девискээрлер турзун дээр болза, бадылаашкынга идепкейлиг киржиңер, деп кожуун чагыргазы чаңгыс чер чурттугларын кыйгырып турар.
/ Алдынай СОЯН.
"Шын" №29 2023 чылдың апрель 22
