Барыын-Хемчик чону идепкейин көргүзүп тур

«Чурттаарынга таарымчалыг хоорай хүрээлеңин хевирлээри» федералдыг төлевилелдиң онлайн бадылаашкыны бо хүннерде чоруп турар. Хоорай, суурларның чурттакчы чону төрээр чериниң чаагайжыдылгазы дээш, бодунуң үнүн чаңгыс катап берип болур. Кожуун бүрүзүнден каш-даа төлевилел киржир. Кожуун бүрүзүнден бир төлевилел онлайн бадылаашкынга эң-не хөй үннү алгаш, 2024 чылда ук төлевилелин боттандырарынга федералдыг акшаландырыышкынны алыр эргелиг болур.

Барыын-Хемчик кожуундан ниитизи-биле беш төлевилел балылаашкында киржип турар. Барлык сумузунга улуг-даа, бичии-даа уруглар ойнаар спортчу шөлдү бүрүнү-биле шүмнээр, ажык сцена база тудары көрдүнген. Ийи дугаар төлевилел болза, Аксы-Барлык сумузунуң төп кудумчузунда ниитизи-биле 15 000 дөрбелчин метр черни чаагайжыдар. Аңаа спорту шөлдер болгаш дыштаныр булуңчугаш база турар. Үш дугаар төлевилелде Кызыл-Мажалыктың Садовая, Чүргүй-оол, Коммунальная кудумчуларын чаагайжыдып, узун сандайлар, бок октаар савалар тургускаш сайгылааннар киирер. Дөрт дугаарында база-ла Кызыл-Мажалыктың Буян-Бадыргы төп кудумчузун чаагайжыдары. Беш дугаарында, Шекпээр сумузунуң Ленин кудумчузунда Демнежилге шөлүн чаагайжыдып, дыштанырынга таарымчалыг болгаш эптиг байдалдарны тургузары көрдүнген.

Үстүнде даңзыда ады кирген төлевилелдерни чүгле бирээзи келир 2024 чылда акшаланжырыышкын алыр. Акшаландырыышкын алыр аас-кежиктиг төлевилелди кожууннуң чурттакчы чону боттары онлайн соңгулдага киржип тодарадыр аргалыг. 14 хардан өрү назылыг хамааты бүрүзү чаңгыс катап соңгуур. Хоорайда азы Тывадан дашкаар-даа чурттап чоруур чаңгыс чер чурттугларывыс бодунуң төрээн суурунуң хөгжүлдези дээш, онлайн бадылаашкынга киржир эргелиг.
Барыын-Хемчик кожууннуң чону өске кожууннарга көөрде онлайн бадылаашкынга идепкейлиг киржип турар дээрзин күрүнениң ачы-дуза платфомазындан (гоуслуги) көстүп турар. Беш төлевилелдиң аразындан Барлык сумузунуң чурттакчылары амдыызында эң-не хөй 2399 үннүг болза, ийиги черде Аксы-Барлык сумузу – 2223 үннүг, а Шекпээр дээш амдыызында 2052 кижи үнүн берген. Кызыл-Мажалыктың ийи төлевилелиниң бирээзи 1902, а өскези – 39 үннүг болуп турар.

Онлайн бадылаашкынның доостурунга чедир каш-ла хонук арткан-даа болза май 31-ге чедир ам-даа үе бар. Соңгуваан хамаатыларны онлайн бадылаашкынга киржип, бодунуң чурттап турары азы төрээн чериниң девискээриниң чаагайжыдылгазынче кичээнгейин угландырарынче кыйгырдывыс!

Айдың ОНДАР.
Чуруктарны интернет четкизинден алган.