ТР-ниң өөредилге сайыдының бирги оралакчызы Орлан Соян Сүт-Хөл кожуунга ажыл-агыйжы сургакчылаашкын үезинде ук кожууннуң школаларының чаа өөредилге чылынга белеткелин хынаан.
Кара-Чыраа ортумак школазының директору Орланмаа Ондар:
– Ийи школа, уругларның чемненир чери, күш-ажыл кичээли эрттирер мастерская болгаш спортчу зал дээш беш оран-савалыг бис. Бо оран-саваларның эң-не баштайгызы 1949 чылда, а сөөлгүзү 1990 чылда туттунган. Оран-сававыс эргижирээн-даа болза, өөредилгениң шынары эки. Школа дооскаш, дээди болгаш ортумак өөредилге черлеринче кирип ап турар уругларның саны хөй. Чаа өөредилге чылында уруглар чылыг, чырык, арыг-силиг школага өөрензин дээш, шыдаар-ла шаавыс-биле белеткендивис. Амдыызында чедер-четпестер бар, ынчалза-даа август 15-те чүс хуу белен болур. Чугайлаар, дозулаар дээн ышкаш иштики септелге ажылдары доозулган. Ам чүгле херим чугайлаары арткан. Хөмүр-дажывысты эрткен одалга сезонундан бежен ажыг тоннаны арттырып алган бис. Одалга четкилери кышкы сезонга белен.
Класстарда дериг-херекселдер эргижирээн. Амгы шагның эт-севинге дүүшпес болуп турар. Ындыг-даа болза башкылар боттарывыс оларны эде-хере тыртып турар бис. Интерактивтиг самбыралар кожуунда чүгле бистиң школада чок. Ноутбуктар уругларга чедер, ол талазы-биле ажырбас. Интернет четкизи база эки тыртып турар.
Кадрлар айтырыының талазы-биле бергедээшкиннер чок. Школада ниитизи-биле 127 уруг өөренип турар. Бо чылын 11-ги классты алды уруг чедиишкинниг дооскан. Келир чылын 11 дугаар класска ийи уруг өөренир. Чеди курзукпайлар бо чылын билигже баштайгы базымын кылыр.
Айдың ОНДАР белеткээн.
Буян ООРЖАКТЫҢ тырттырган чуруктары.
"Шын" №58, 2023 чылдың август 5
