Муниципалдыг тургузугларның Төлээлекчилер хуралдарының депутаттарының шиитпири-биле, республиканың Ак-Довурак хоорай база Тес-Хем кожуун чагыргаларының чаа удуртукчуларын томуйлаан.
Тес-Хем кожууннуң чагырга даргазының хүлээлгезин Олег Чангы-оол күүседир кылдыр томуйлаан. Олег Санхоевич Тес-Хем кожууннуң Берт-Даг чурттуг 1988 чылда Красноярскының политехниктиг институдунга инженер-механик мергежилди чедип алган. Төрээн Тес-Хем кожуунунуң «Чодураа» совхозунга күш-ажылчы намдарын эгелээн. «Самагалдай» септелге-техниктиг бүдүрүлгезинге кол инженерлээн.
«Тувапосредкомпания», «Продснаб» хуу бүдүрүлгелерни удуртуп, хууда сайгарлыкчы чорук-биле ажылдаан. 2019 чылдан тура «Агросоюз» КБК-ны башкарган. Республиканың көдээ ажыл-агый сайыдының оралакчызы эрге-дужаалды ээлеп тура, көдээ ажыл-агыйын хөгжүдүп сайзырадыр айтырыгларны бөгүнге чедир харыылап турган.
Ак-Довурак хоорай округунуң Төлээлекчилер хуралының депутаттарының шиитпири-биле, Андрей Алдын-оолович Сат хоорай чагыргазының даргазы албан-хүлээлгени күүседип эгелээн. Чөөн-Хемчик кожууннуң Чыргакы суурнуң чурттакчызы Андрей Сат хамааты күрүне албанында ажылдаан улуг арга-дуржулгалыг. Чаа албан-дужаалга томуйладырынга чедир Ак-Довурак хоорай чагыргазының составынга ажылдаан. 1995 чылда спорт комитединиң даргазындан эгелээш, чагырга даргазының хөй-ниити каттыжыышкыннарының ажыл-чорудулгазын дүүштүрер оралакчызынга чедир ажылдаан. 2006–2011 чылдарда — Ак-Довурак хоорай округунуң баштыңы – Төлээлекчилер хуралының даргазы. Республиканың сайгарлыкчыларының эрге-ажыын камгалаар ажыл-чорудулганы чорудуп турган.
/ Бистиң корр.
"Шын" №41 2023 чылдың июнь 7
