«Айыыл чок чоруктуӊ трафареттери» — чадаг кижилерниӊ оваарымчалыг болурун сагындырып турар тускай бижиктерлиг чурук.
Найысылалдыӊ кудумчуларында чадаг кижиниӊ орук кежер чериниӊ чоогунда тротуарларда парламал бижиктерни Күрүне автоинспекциязы биле республиканыӊ Орук-транспорт комплекизиниӊ яамызыныӊ ажылдакчылары кылып турар.
«Наушнигиӊ уштуп ал», «Орук кежери айыыл чок-тур бе, бүзүреп көрүп ал», «Урууӊну холундан чедип ал» деп сүмелерни ак будук-биле парлап бижип турар.
Орук кежерде, телефоннар, гаджеттер тудуп алгаш, ону көрүп тургаш, онза айыылдыг байдалдарга таваржып болурунуӊ дугайында Кызылдыӊ чурттакчыларынга тайылбырлаан. Чырык херелдендирер чүүлдерниӊ ажык-дузазын, чадаг терге мунуп алгаш, оруктуӊ халдыр кезээнге аргыжарда, шын дүрүмнү сагыырын база чугаалаан.
Чадаг кижилерниӊ бодамча чок орук кежер чоруу онза айыылдыг байдалды тургузуп турар. Чүге дизе орук кежип болбас черге хенертен чадаг кижиниӊ көстүп келирин чолаачы кажан-даа манавайн турар. Ынчангаш кижиниӊ кадыкшылы болгаш амы-тыны үнелиг болганда, Орук шимчээшкиннериниӊ дүрүмүн ыяк сагыыр ужурлуг дээрзин Күрүнениӊ автоинспекторлары дыӊнадып турар.
ТР-де ИХЯ-ныӊ Күрүне автониспекциязыныӊ эргелелиниӊ медээлеринден Р. Демчик белеткээн.
