Кызыл хоорайның 110, Тываның 80 чыл оюнга база тус чер чагыргазының хүнүнге тураскааткан 6 дугаар чаңчыл болган хол бөмбүүнүң маргылдаазы "Сүбедей", "И. Ярыгин", "Херел" спорт залдарынга апрель 19–21 хүннеринде болган. Маргылдаа шыырак дээн 24 эр база 18 херээжен командаларның киржилгези-биле бедик деңнелге болуп эрткен. Ооң кол сорулгазы — коллективтер, бүдүрүлгелер, сургуулдар аразынга кадык чорук дээш, хол бөмбүүн калбаа-биле сайзырадыры база шыырактарны илередип, эр-херээжен күштүг, дээди чаданың командаларын белеткээри болур.
Маргылдааның ажыдыышкынынга Кызыл хоорайның Төлээлекчилер хуралының даргазы, маргылдааның кол деткикчизи Ирина Казанцева спортчуларга байырны чедирип, ээлчеглиг 6 дугаар маргылдааны ажыттынган деп чарлаан. Маргылдааның кол шииткекчизи Аржаана Иргит командаларны "И. Ярыгин", "Херел", "Сүбедей" спорт залдарынга ойнаар кылдыр 3 бөлүкке чарган.
Үш хүн иштинде үргүлчүлээн маргылдааның түңнелинде боттарының бөлүктеринге дараазында командалар шылгарааннар. Эр улус аразынга ТР-ниң Спорт яамызындан “Найысылал”, Тывахарылзааинформдан “ТСИ” база “Дөгээ-1” база херээжен ойнакчылардан “МЧС-1”, “Чеди-Хаан”, “Сүбедей” командалары Кубок шаңналы дээш түңнел оюннарга изиг-изиг, удур-дедир утчуп тургаш, чараш оюннарны көргүскеннер.
Аарыкчылар бо удаада "Сүбедей" спорт ордузунга долу болганы-биле ойнакчыларның хей-аъды көдүрлүп, туруштуг, дидим оюннары-биле тренерлерин, көрүкчүлерин, деткикчилерин өөрткеннер.
Эр ойнакчылар аразынга 1 дугаар черже “Найысылал” командазы үнгеш, Кубокту чаалап алган. 2-ги черни “Дөгээ-1”, 3 дугаар черни “ТСИ” командалары үлешкеннер.
Херээжен ойнакчылар аразынга “МЧС” командазы тергиидээш, бирги черже үнүп, 5 дугаар чыл улай Кубокту бүзүрелдии-биле чаалап алганнар. Шаңналдыг 2–3-кү черлерни “Чеди-Хаан” биле “Сүбедей” командалары үлешкеннер.
Маргылдааның деткикчилери шаңналдыг черлерже кирген командаларга дипломнарны, медальдарны, 50–40-30 муң акша шаңналдарын байырлыг байдалга тывыскан.
Тускай байыр чедириишкинин база шаңналдарны дараазында шылгараан шииткекчилер, ойнакчылар алганнар: шииткекчилер аразындан Денис Сагаан-оол, Алексей Салчак, Тимур Ондар, Тимур Саая, Кежик Кара-Сал, Анатолий Кошкулак, Уран-Мерген Доржу, Ай-Демир Монгуш, Роза Хайдып, Чечена Дажы; эр, херээжен ойнакчылар аразынга “Шыырак халдакчы” деп тускай шаңналдарны Валентина Салчак (Төлээлекчилер палатазының командазындан) база Дугар Ооржак (“Башкы” командазы); “Тергиин көдүрүкчү” деп атка – Шеңне Кылгыдай (“Чеди-Хаан”) база Салгын-оол Түлүш (Найысылал); тергиин камгалакчы – Асима Тарган (МЧС) база Александр Ондар (МЧС); тулган ойнак- чы – Камила Күжүгет (“Башкы”) база Айдың Салчак (“Дөгээ”). Шупту акша шаңналдарынга төлептиг болганнар.
Чаңчыл езугаар “Чаңгыс демниг Россия” партиязы, эң шыырак шылгараан тренерлер дээш С. Тодошевага ("Сүбедей") база А. Доржукайга (Найысылал) грамота база тускай белектерни тывыскан. Ол ышкаш “Дөгээ” командазындан Менди Соскалга “Чаа улус” партиязы эң үнелиг ойнакчы дээш тускай белекти тывыскан.
Сөөлгү сөстү “Сүбедей” командазының тренер башкызы Светлана Тодошева алгаш, маргылдааның удуртукчуларынга болгаш деткикчилеринге, хол-бөмбүүнүң оюну кезек үеде Тывага куду байдалга баткан турда, оларның деткимчези-биле катап хөнүп олурарын демдеглеп, база шупту ойнакчыларның мурнундан, четтиргенин илередип, эки сайзыралдың йөрээлин салган.
Алексей ЧАМБАЛ-ООЛ.
Авторнуң тырттырган чуруктары.
«Шын» №31 2024 чылдың апрель 24
