Тываныӊ Ѳѳредилге яамызыныӊ дыӊнадыы-биле, бо чылын «Кѳдээ суурнуӊ башкызы» программага киржири-биле 30 башкы документилерин дужааган. Январь 10-да чарлаан программаныӊ шилилге мѳѳрейинче документилер хүлээп алыр хуусаазы апрель 15-те доозулган.
Тываныӊ Баштыӊы Владислав Ховалыг федералдыг программаныӊ ачызында 1 сая рубльдиӊ тѳлевир хевири башкыларга деткимчени берип, кѳдээ суурларда школаларныӊ башкыларыныӊ хостуг олудун бедик мергежилдиг специалистер-биле четчелээринге улуг ужур-дузалыг болуп турар деп демдеглээн.
РФ-тиӊ Президентизи Владимир Путинниӊ шиитпири-биле боттанып турар «Кѳдээ суурнуӊ башкызы» тѳлевилел 2030 чылга чедир уламчылаар.
Бо чылын программа ёзугаар киржикчилерге 13 олутту доктааткан:
- 4 орус дыл болгаш чогаал башкызы;
- 4 математика башкызы;
- 2 математика болгаш физика башкызы;
- 1 англи дыл башкызы;
- 1 биология башкызы;
- 1 эге класс башкызы.
Башкыларны Бай-Тайга, Барыын-Хемчик, Чѳѳн-Хемчик, Каа-Хем, Кызыл, Ѳвүр, Бии-Хем, Сүт-Хѳл, Таӊды, Тес-Хем, Тожу, Чеди-Хѳл, Эрзин кожууннарның школаларында манап турар.
Тывада Президентиниӊ деткимчезиниӊ ачызында 49 башкы 1 сая рубльди алгаш, кѳдээ суурларже ажылдап-чурттаары-биле кѳжүп чорупканын сагындырып каалы.
Чурукту интернет четкизинден алган.