Өг-бүле альбому
«Каа-Хем кожууннуң өг-бүле альбому» деп кожуун чергелиг фото-чуруктар мөөрейи болуп эрткен. Шупту киржикчилер өг-бүлезиниң амыдыралындан эң-не чылыг болгаш сеткилинден үнген үзүндүлер-биле үлешкен. Бирги черни Суг-Бажы сумузунуң чурттакчылары Артыш, Айлана Пильчеймааларның өг-бүлези алган. Ийиги черни Күдерек, Айда-Сай Мөңгүн-оолдар, а үшкү черни Арсен, Чойгана Ховалыглар чаалап алган.
Кызыл-Тайгада «Эзирлер уязы»
Эрткен неделяда Сүт-Хөл кожууннуң Кызыл-Тайга сумузунга губернатор төлевилели-биле туттунган «Эзирлер уязы» спорт залдың ажыдыышкыны болган.
ТР-ниң спорт сайыды Владимир Түлүш, Европа чемпиону Начын Моңгуш болгаш кожуун чагыргазының удуртукчулары байырлыг ажыдыышкынның хүндүлүг аалчылары болган.
Чаа хүреш залының тудуунга сумунуң улуг-бичии чурттакчы чону идепкейлии-биле киржип турганнар. Оларның аразында аалчылар, чаңгыс чер чурттуглар болгаш спортчулар дээш кымны чок дээрил. Тудугга киришкен чоннуң ачызында Кызыл-Тайга сумузунда үрде манааны спортчу зал ажыттынганы ол. Ынчангаш ТР-ниң Спорт яамызының өөрүп четтириишкин бижиктери-биле дараазында хамаатыларны демдеглээн: Болат Түлүш, Хая Моңгуш, Кежик Моңгуш, Комбу Ондар, Али Доңгак, Андрей Күжүгет, Айдыс Күжүгет.
Буянныг үүлени кады кылган
Таңды кожуунда хөй ажы-төлдүг болгаш амыдыралы чегей өг-бүлелерге дуза кадар ажылдар уламчылап турар. Тус черниң чагырга чериниң ажылдакчылары хууда сайгарлыкчы Байлак Ооржактың аңгылап бергени черге картофельди тарааш, ажылдакчылар болгаш чон кады демнешкеш, ниитизи-биле 3 тонна картофельди ажаап алган.
Ол дээрге-ле анаа-ла дүжүт ажаалдазы эвес, а бот-боттарынга сагыш човаашкынның демдээ-дир. Ылаңгыя Тургузукчу күш-ажылдың болгаш өг-бүле ыдыктарының чылында шак ындыг ажыл көскү черни ээлеп турар дээрзи билдингир.
Ачы-буян чедирилгези
С. Чакар аттыг Эрзин ортумак школазының 10-гу классчылары Нарын сумузунуң «Уургай» көдээ ажыл-агый кооперативиниң кыштаанда малчыннарга дузалашкан.
«Уургай» кооперативи мал ажылын колдадыр кылып чоруур. Кооператив тургустунгандан бээр 26 чыл болуп турар. Школачылар кажаа коптарган, а оларның ада-иелери малчынның бажыңын чугайлаарынга дузалашкан.
Амбын-Ноян шөлүнге күскү ярмарка
Дыштаныр хонуктарда Тес-Хем кожууннуң төвү Самагалдай сумузунда Амбын-Ноян шөлүнге дүжүт ажаалдазының ярмарказы болуп эрткен.
Кожууннуң фермерлери болгаш өске-даа ногаажылары чаагай дүжүдүн делгээн. Ында ногаа аймаандан аңгыда, тыва малдың эъдинден хайындырып тушёнкалаан эът, ары чигири, тайга тооруу, кат-чимис болгаш эм оъттар дээш чүү-даа бар. Ол баартыктарда чаа эскен изиг хлебтер, боорзактар, үске быжырган далганнарның амданныг чыды эрткен-дүшкен чорумалдарны хаара тудуп турган.
Культура ордузу
Бүгү-россия чергелиг уругларга культура-өөредиглиг төптер тургузар талазы-биле мөөрейге Эрзин кожууннуң Булуң-Бажының ном саңы тиилээн. «Өг-бүле» национал төлевилелдиң «Өг-бүлениң үнелиг чүүлдери болгаш культура инфраструктуразы» деп федералдыг төлевилел ёзугаар Булуң-Бажынга уругларга культурлуг төп ажыттынар.
Программа ёзугаар ном саңының оран-савазынга септелге ажылдары кылып чорудар база эт-сеп, компьютер болгаш интерактивтиг дериг-херексел-биле ном саңын чаартыр.
А. ОНДАР белеткээн.
Чуруктарны кожууннарның чагырга черлериниң соцчеткилерде арыннарындан алган.
“Шын” №37 2026 чылдың сентябрь 24
"Шын" солуннуң МАХ-каналынга каттыжыңар: max.ru/channel_shyn