Коммунал инфраструктура модернизастаар программаның республикада боттанылгазы-биле Шагаан-Арыгда эде чаартыры планнаттынган даштыкы инженер четкилеринде тудуг-монтаж ажылдарының бирги кезээ бо чоокку хүннерде эгелээнин Тываның чуртталга-коммунал ажыл-агыйы дыңнаткан.
Хоорайның коммунал инфраструктуразының Саян-Шушенское кудумчузунда элээн бергедээн участоктарда ажылдарны бо чылдың төнчүзүнге чедир кылыр. «Бастион» КХН тудуг организациязы «ТСП» КУБ-биле кады, эргижирээн хоорзаларның орнунга чаа хоорзаларны салыр. Шагаан-Арыг четкизинде тудуг-монтаж ажылдарыың кол кезиин келир чылда планнаан. Сельская, Юбилейная, Улуг-Хемская, Рабочая, Гагарин, Фестивальная, Октябрьская, Горная, Новоселов, Студенческая база Енисейская кудумчуларда суг хандырылгазының база суг чорударының хоорзаларын эде солуур.
«Авангард» КХН-ниң специалистери амгы үеде Шагаан-Арыгда суг хандырар база суг дамчыдар четкилер участоктарын эде чаартырынга херек төлевилел-смета документилерин ажылдап кылып турарын ЧКА яамызы дыңнаткан.
Төлевилел-смета документизин белеткээр мурнунда, геодезистерниң киржилгези-биле суг хандырар база суг дамчыдар четкилер чыдар черниң ханызын, координаттарын демдеглээр ажылдарны кылган.
Тыва Республиканың коммунал инфраструктура чаартылгазының регионалдыг программазының күүселдези-биле Шагаан-Арыгда суг хандырар база суг дамчыдар четкилерни чаартыр хемчеглер планнаттынганын сагындыраал. Россияның Президентизи Владимир Путинниң Айыткалында коммунал четкилерни чаартыр чаа программаны чуртка ажылдадыр дугайында айыткалын боттандырар сорулга-биле, республика Баштыңы Владислав Ховалыгның даалгазын күүседип, регионнуң ЧКА яамызы программаны ажылдап кылган. РФ-тиң Чазак Даргазының оралакчызы Марат Хуснуллинниң удуртканы комиссия документини хүлээп алган.
Шагаан-Арыг болгаш Кызылдың чылыг болгаш суг хандырылга объектилери кирген программаның бирги чадазы 2024 чылдың төнчүзүнге чедир доостур ужурлуг. Бирги чадазында ниитизи-биле 32 км инженер четкилерин чаартыры планнаттынган.
ТР-ниң Чазааның парлалга албаны.
"Шын" №65, 2023 чылдың сентябрь 2