Бо чылын найысылал Кызылдың төп кудумчуларында автотранспорт болгаш чадаг кижи оруун алгыдып, орук шывыын чаартып турар.
Машина-балгаттың көвүдээни-биле, найысылалдың төп кудумчуларынга «орук бөөшкүннери» бо-ла туруптар. Чазак-чагырга чогуур хемчеглерни үе-шаанда ап турары өөрүнчүг. Ооң херечизи – найысылалда амгы улуг орук тудуу.
Совет үеден эгелээш Кызылдың төвүнге орук шимчээшкини колдуунда Кочетов кудумчузунга турган, амгы чаартылгаларның түңнелинде Ленин кудумчузунуң автотранспорт чоруур оруу алгып, дилиндектер саны 4 чедер. Чаарттынган Ленин кудумчузу Кочетов кудумчузунуң «орук чүъгүн» чиигедип, ылаңгыя хууда машиналарны ынаар углап апаары чугаажок.
IV буддийжи шуулганга белеткел ажылдарын ТР-ниң Баштыңы Владислав Ховалыг шыңгыы хайгааралга ап, боду хынап турары кончуг эки.
Ол найысылалдың Щетинкин-Кравченко кудумчузун, ылаңгыя Цеченлинг хүрээзиниң чанында оруктарны, машиналар турар черлерни база чаартып кылырын дааскан. Ол ажылдар уламчылап турар.
Төп кудумчуларны чаартып эгелээнинден энергетиктерге база чаа ажыл тывылган. Оруктарны алгыдып эгелээни-биле кудумчу сайгылгааннары аскан демир-бетондан кылган чагылар орук ортузунда апарганнар. Оларны чаа орук кыдыынче көжүрер ажыл база белен эвес, чымыштыг болгаш харыысалгалыг.
Ол ажылды «Бастион» КХН чорудуп турар. Ооң кол инженери Сандан Ондарның чугаалап турары-биле, олар бо чылдың июль айның 31-ге чедир Ленин кудумчузунда сайгылгааннар аскан 72 чагыны чаартыр. Эрги демир-бетон чагылар орнунга демир чагыларны тургузар. Чагылардан аңгыда, кудумчу сайгылгааннарын база электри күжүнге камналгалыг болгаш чырыы чедер, ажыглаар хуусаазы узун светодиодтуг чаа сайгылгааннар-биле солуур.
Ам бо хүннерде «Бастионнуң» Сандан Ондар баштаан ажылчыннары эрги демир-бетон чагыларны уштуп турарлар. Чаа демир чагыларны соңгаарга кылдырткан, олар орукта кел чыдар.
/ Эртине АРАКЧАА.
Авторнуң тырттырган чуруу.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...