Альберт Ондар Сүт-Хөлдүң Кызыл-Тайга деп ырак-узак суурундан ойнадып алган машиназын алыр дээш бүдүн өг-бүлези-биле чедип келген. Бо болза ооң назынында бир дугаар улуг ойнадып алыышкын болган. Дүжүм бе, түлүм бе деп, бүзүревейн турганын ол сактып чугаалаан.
«Бо Лада Гранта черле бистии болур дээрзинге өөм ишти хөлчок бүзүреп турган, ол дугайында үш хонуктуң дургузунда кулаам уюктап келди, бүдүү билир кижи ышкаш. Ооңуу ышкаш болду-даа ынчаш. Авам акушерлеп ажылдап турган, малчын коданнарже чалалгаларже чедип, чеже хире херээженнерниң караан чырытпаан, чаштарның алгызын дыңнаваан кижи. Соң-даарта бо буянныг үүле ооң ажы-төлүнге харыы болуп чедип келгени бо-дур. Бо акцияның организакчыларынга улуу-биле өөрүп четтирип тур мен” — деп, А. Ондар демдеглээн.
Ондарларның өг-бүлезинде үш ажы-төл бар: ийи оол, бир уруг. Шуптузу өглүг-баштыг. Альберт Ондар барык 20 чыл хире хөмүр-даш уургайынга ажылдааш, чоокта чаа хүндүлүг дыштанылгаже үнген. Ам кырган-ача ачыларын алчып олурар.
Улуг белек алыр дээш келген өг-бүле кайыын хол куруг кел чыдар боор, торттуг келген. Ында Лада Гранта машинаны дүрзүлээн.
Альберт Ондарның өөнүң ишти Өлзеймаа Ондар база эмчи кижи, оларның ийи ажы-төлү иезиниң изин истеп, эмчиниң салым-чолун шилип алган.
Бистиң корр.
Буян ООРЖАКТЫҢ тырттырган чуруктары.
“Шын” № 23 2024 чылдың март 27
