Чоокта чаа Эрзин кожууннуң Мөрен сумузунга тускай флюорография машиназы келген. Сумунуң чону рентген эмчилери келген деп чугаалажы бээрге, дыка хөй чон оочурлап тургаш, эртип алдывыс. Кызылдан келген эмчилерниң чонга хамаарылгазының эптиин, эвилең-ээлдээн эскерип көрдүм. Ыраккы кожууннарже үнүүшкүннерни кылып, көдээ чонга ачы-дузазын көргүзүп турарынга дыка-ла өөрүп турдувус. Ол эвес болза, кожуун төвүнче чедип, хөрек хынадыр апаар болгай бис. Ажылы чай чок азы ырак-узак чер чедип шыдавас, назылап кыраан хоочуннар рентген эртип алыр аргалыг болдувус. Рентген лаборантызы эмчиниң адын Сергек Сылдыс-оолович Сагды, а машиназының чолаачызын Кызыл-Эник Александрович деп билип алдым.
Ол хүн Мөренниң эмчилери Рита Нонаевна Севек (улуг эмчи), Алдынай Анатольевна Баанай, Эрзинден келген дузалакчы эмчивис Чойгана Борбак-ооловна Шомбул олар база чонну хүлээп, шинчилгелерни эрттирген. Буянныг эмчилерниң ажылын онзалап демдеглээр-дир мен. Ынчангаш Кызылдан, Эрзинден келген, ол ышкаш Мөренниң эмчилеринге чаңгыс чер чурттугларымның мурнундан өөрүп четтиргенимни илередир-дир мен.
/ Чечекмаа САДИ, ТР-ниң алдарлыг ажылдакчызы.
Авторнуң тырттырган чуруктары.
“Шын” №15 2026 чылдың апрель 23
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY