Кызыл кожууннуң Сукпак сумузунда ногаа шыгжамырын Александр Желтухин ажыткан. Ук төлевилелче ниитизи-биле 89,6 сая рубль үнген. Ооң 22,4 саязы Тываның тускай социал экономиктиг хөгжүлде программазының деткимчези.
ТР-ниң Баштыңы Владислав Ховалыг чаа ажыттынган ногаа шыгжамырының ажыл-ижин сонуургап четкен.
«Александр Петрович – дуржулгалыг башкарыкчы. Ол ногаа болбаазырадыр болгаш консервалаар, ваакумнаар цехти ажыдып шыдапкан. Ногааны шыгжаар, болбаазырадыр арга бар апарганда, ону хөйнү тарыыры чугула-дыр. Ынчангаш тарылга шөлүн калбартыр аргаларны болгаш суггат айтырыын өөренип көргеш, дузалаар бис»– деп, Тыва Республиканиң Баштыңы Владислав Ховалыг демдеглээн.
Бо хүннерде шыгжамырда 750 тонна картофель, капуста, согуна, свекла бар.
Шыгжаттынган ногаа-биле янзы-бүрү салаттарны, солянканы, икраны, рагуну кылыры бүдүрүлгениң планында көрдүнген. Баштай уруглар садтары, школалар дээн ышкаш бюджет организацияларынче, оон садыг-саарылга төптеринче бараанны сөөртүр дээрзин бүдүрүлгениң удуртукчузу дыңнаткан.
2024 чылдың чазынында картофельдиң үрезинин чонга халаска үлээш, күзүн олардан дедир садып алырын Александр Желтухин планнап турар.
Айдың ОНДАР.
Ада ТЮЛЮШТУҢ тырттырган чуруктары.
"Шын" №99 2023 чылдың декабрь 27
