Тываның чурттакчыларының социал пенсияларын апрель 1-ден эгелеп 7,5 хууга көвүдедир деп Россияның Социал фондузунуң Тыва Республика талазы-биле салбыры санаан. Көвүдедир санаарының деңнели пенсионерлерниң эрткен чылда чуртталгазының эң кудуку деңнелиниң өзүлдезинден хамааржыр. Бо 2024 чылда 18 муң кижиниң пенсиязын көвүдедир санаан.
Социал пенсияны хамаатыларга олар инвалид апарганда, азыраар кижилерин чидиргенде азы камгаладылгалыг пенсияны бээринге ажыл стажы четпээн улуг назы-харлыг кижилерге бээр. Кыраан ужурунда социал пенсияны камгаладылгалыг пенсиядан 5 чыл орайтады бээр.
“Хамаатының ажыл стажын болгаш ажыл төлевирин барымдаалап санаарындан хамааржыр камгаладылгалыг пенсиядан социал пенсияның ылгалы ону алыр кижилерниң категорияларын барымдаалап, доктааткан хемчээлге социал пенсияларны санап бээри.
Ындыг хевирниң социал деткимчезин назы-хары улуг кижилерге, инвалид апарган азы азыраар кижилерин чидирген хамаатыларга, оларның ажыл стажындан болгаш пенсияның хууларындан хамаарылга чокка бээр” – деп, Россияның Социал фондузунуң Тыва Республика талазы-биле салбырының башкарыкчызы Светлана Кенден тайылбырлаан.
Регионда пенсионерниң чуртталгазының эң кудуку деңнелинден эвээш пенсиялыг ажыл чок хамаатыларга немелде социал төлевирлерни берип турары оларның пенсия хандырылгазын регионда пенсионерниң чуртталгазының эң кудуку деңнелинден эвээжетпес арганы тургузуп турар.
Россия Федерациязының хамаатылары, РФ-тиң девискээринде доктаамал чурттап турар даштыкы хамаатылар база хамааты эргези чок хамаатылар социал пенсияны алыр эргелиг. РФ-тиң девискээринде оларның доктаамал чурттап турарын чурттап турары черде бүрүткеткен дугайында документилер-биле бадыткаар, чурттап турар черинде бүрүткел документизи чок таварылгада – херек кырында чурттап турар черин айыткан хууда билдириишкини-биле бадыткаар.
Бир эвес силерде айтырыглар бар болза, Россияның Социал фондузунуң Тыва Республика талазы-биле салбырының харылзаа төвүнде 8-800-200-0543 телефонче ажыл хүннеринде 09.00 шактан 18.00 шакка чедир долгап болур.
«Шын» №25 2024 чылдың апрель 3
