Тывада күштүг суг үерлээшкининден үрелген Ак хемни кежир көвүрүг чоогунда, «Ак-Довурак – Абаза» автоорук участогу-биле шимчээшкин катап эгелээн. Түр үениң кежии тавартыр Тыва биле Хакасияның аразында ол оруктап аргыжылга тургустунган.
“Р-257 федералдыг оруктап Кызылдан кожа-хелбээ Хакассияже орукче үе-даа, акша-даа хөй үнер, ынчангаш түр үениң оруун дүрген ажыдар херек” – деп, Тываның Баштыңы Владислав Ховалыг социал четкилерде бодунуң блогунда бижээн. Оюп кежер орукту кончуг дүрген кылганы дээш, Тываның Орук-транспорт яамызының база орук албаннарының ажылдакчыларынга четтиргенин илереткен.
Автооруктуң үрелген участогунда быжыглаашкын ажылдары бөгүн база уламчылап турар. Регион удуртукчузунуң чугаазы-биле алырга, суггур чаъстаашкындан база хем дажаанындан үрелген ол көвүрүгнү катап кылырынга элээн хөй акша-хөреңги херек. В. Ховалыгның дилээ-биле тургускан ажылчын бөлүктүң составында Росавтооруктуң эксперттери республиканың автооруктарда үрелген участоктарны болгаш объектилерни бо хүннерде хынап чоруп турар. Специалистер ам-даа бир неделя ажылдаар.
Тываның Баштыңы республиканың Экономиктиг сайзырал болгаш тарифтер албанынга көвүрүг үрелгенинден Барыын-Хемчиктиң садыг черлеринде аъш-чем аймаанга база кывар-чаар чүүлдерге өртектер өстүргенинге хамаарыштыр мониторинг чорудар даалганы берген.
Мониторингиниң түңнели-биле чогуур хемчеглер алдынар.