Өвүр кожуунче баар Р-257 федералдыг трассаныӊ 1072 километринде, Ак-Хем деп черде «Тывахарылзаа информ» акционерлиг ниитилелдиӊ интернет кабелин үремикчи кижилер үзе кезип апарган болган.
Волокно-оптиктиг шугум Өвүр болгаш Мөӊгүн-Тайга кожууннарга чурагайлыг харылзааны дамчыдып турар. Ийи кожууннуӊ суурларыныӊ эмнелгелери, школалары, эрге-чагырга болгаш өске-даа албан черлериниӊ интернеди кезек када үзүлген.
Электри харылзаазыныӊ шугуму үстү бээрге, ЕГЭ шылгалдаларын эрттирбейн баар айыылдыг байдал тургустунуп келген. Ооӊ аӊгыда, мобильдиг операторларныӊ, 112 дугаар-биле оперативтиг дуза системазыныӊ ажылы түр үеде соксай берген. Федералдыг айыыл чок чорук албаныныӊ, Яла күүселдезиниӊ федералдыг албаныныӊ, ИХЯ-ныӊ күүсекчи эрге-чагырга органнарыныӊ болгаш республиканыӊ Кадык камгалал яамызыныӊ харылзажыр системазыныӊ ажылы кезек үеде ажылдавайн барган.
Тус черниӊ харылзаа оператору интернет четкизин катап шалыпкын кожуп кылган. «Тывахарылзаа информ» ниитилелдиң абонентилеринге болгаш компанияныӊ өнчү-хөреӊгизинге чедирген каража-когаралдыӊ түӊүн санап турар.
Кабельдер үрээр болгаш оларны оорлаар чорукту илередир, баш бурунгаар болдурбас талазы-биле чогуур хемчеглерни кожууннуӊ удуртулгазы эрге-хоойлу камгалаар органнар-биле кады эрттирип турар.
Өвүр кожууннуӊ медээзи-биле Р. Демчик белеткээн.