Тываның культура сайыды Виктор Чигжит кожуун чагырыкчылары-биле кады хүннүң-не культура объектилериниң байдалын хынап турар. “Ажыл-агыйның кайы хире чоруп турарын билип алырда, бодумнуң карактарым-биле көөрү меңээ чугула” – деп, культура сайыды чугаалаан.
Ажылчын сургакчылаашкын үезинде ол Барыын-Хемчик болгаш Сүт-Хөл кожууннарда объектилерниң капитал септелгезин хынап көрген.
Бо чылын федералдыг бюджеттиң акшаландырыышкыны-биле Эрги-Барлык болгаш Алдан-Маадыр сумуларының культура бажыңнарында капитал септелгени чорудуп турар. Септелге ажылдары план ёзугаар чоруп, барык доостур четкен. Амгы үеде иштики ажылдарда келген.
Оон ыңай Эрги-Барлык болгаш Аксы-Барлык сумуларының культура бажыңнарынга база четкен. Ук оран-саваларга капитал септелге кылыры негеттинип турар.
Улаштыр Кызыл-Мажалыктың уругларның ном саңынга сагындырыг чокка четкен. Ында уругларның хостуг үезин ажыктыг эрттирип турарын көөрге өөрүнчүг болган. Уругларның хостуг үезин чогумчалыг эрттирер төптүң хемчеглеринде ном саңының ажылдакчылары-даа, уруглар-даа идепкейлиг киржип турары көскү. Культура ажылдакчылары чайгы үеде уругларны ажыктыг хемчеглерже шак ынчаар хаара тудуп турар.
Сүт-Хөл кожууннуң Кара-Чыраа суурунда “Сорунза” губернатор төлевилели-биле көдээ культура бажыңы туттунуп турар. Объектиниң ханаларын тудуп үндүрүпкен, кырын шывар ажылдар чоруп турар. Культура бажыңының ажыдыышкынын бо чылдың август төнчүзүнде эрттирерин планнап турар.
Культура сайыды объект бүрүзүнде берге айтырыгларны билип алган. Шак бо угланыышкын-биле ажыл уламчылаар дээрзин ол дыңнаткан.
Культура яамызының медээлеринден