Тываның Баштыңы Владислав Ховалыг Россияның Президентизи Владимир Путинге Тываның социал-экономиктиг сайзыралының дугайында илеткээн.
Беш чыл бурунгаар чурттуң удуртукчузу регионну башкарар кылдыр аңаа бүзүрээн дээрзин Владислав Ховалыг сагындырган. Ооң чугаалап турары-биле алырга, Тыва бо үе дургузунда бүгү чурт-биле деңге сайзыралче бурунгаарлап, темпини бадырбайн, экономиканы хөгжүдүп келген.
Регионнуң ниити продуктузунуң элээн өскени кол чедиишкин болган. Беш чыл дургузунда көргүзүглер барык ийи катап көвүдээн. Ажыл чок чорук 4 катап кызырылган. Тываның удуртулгазының улуг ажылын база инвестициязының өзүлдезин Президент демдеглээн.
“Эрткен чыл дургузунда ол бүдүн Россия-биле деңнээрге безин барык ийи катап бедик болган” – деп, Владимир Путин демдеглээн.
Президент ужуражылга үезинде онза кичээнгейни демографияже угландырган. Чуртта ажы-төл төрүттүнериниң талазы-биле тергиидеп турар регионнар аразынче Тыва кирип турарын Владимир Путин демдеглээн. Ону деткиири-биле республикада 2026 чылды Тургузукчу күш-ажылдың болгаш өг-бүле ыдыктарының чылы кылдыр чарлаан.
Шак ол өзүлде-биле кады инфраструктура база деңге сайзырап турар: 5 чыл дургузунда школалар, эмнелгелер-биле катай хаара 1300 ажыг объектилерни туткан, септээн. Эрткен чылын регионга дендии хөй чурттаар оран-саваны ажыглалче киирген. Ол совет үениң көргүзүглеринден безин бедип турар.
Оон аңгыда улуг-улуг инвестицияларны хаара тудуп, муң-муң ажылчын олуттарны тургузуп турар даг-тывыш хөгжүлдезин, Кызылдың аэропортунуң чаартылгазын, Моол-биле чурттар аразында рейстерни база салыпканын Тываның Баштыңы дыңнаткан.
Ужуражылга үезинде Владимир Путин ТШО-да киржип турар тыва дайынчыларның эрес-дидимин үнелеп, республиканың чурттакчыларының фронтуга бүгү талалыг деткимчези дээш өөрүп четтиргенин илереткен.
“Амгы үеде чуртун камгалап турар камгалакчы бүрүзүнге канчаар-даа аажок чоргаарланып турар бис. Боттарывыстың талавыстан дайынчыларывыска болгаш оларның өг-бүлелеринге бүгү чүүлдү кылып турар бис” – деп, Владислав Ховалыг онзалап демдеглээн.
Регионнуң баштыңы президентиниң республикага бүзүрели болгаш кичээнгейи дээш өөрүп четтиргенин илереткеш, Тываның чурттакчыларының чаагай чоруу дээш улаштыр ажылдаарын аазаан.
“Чоокку чылдарда, шынап-ла, улуг ажыл кылдынган. Инвестициялар өзүп, хөй-ле чаа төлевилелдерниң бары өөрүнчүг-дүр. Силерниң деңнелиңерге ол база ажылдаар дээрзинге бүзүреп тур мен. Чедиишкиннерни күзедим” – деп, илеткелди дыңнаан соонда президент түңнеп чугаалаан.
Чуруктарны Кремль.ру-дан алган.