| Кывар-чаар чүүлдер рыногунда |
Тывада кывар-чаар чүүлдер кудуп садып турар станцияларга бензин өртээ май айның ортаа үезинде-ле өзүп эгелээн. Эрге-чагырга органнарының талазындан дыңнадыглар ёзугаар алырга, ооң чылдагааннарының бирээзи кывар-чаар материалдарны мөөңнеп садар российжи рынокта бензин өртээниң өскени, ийиде, республикада кывар-чаар чүүлдер садып турар станцияларның ээлери хууда сайгарлыкчыларның бензинни мөөңнеп садар компаниялар-биле керээлериниң чогу.
Чолаачыларның эң хөй ажыглаары А-92 марканың бензининиң өртээ Кызыл хоорайда хууда станцияларда июль айның ийиги чартыында 1 литрде 140 рубль чоокшулаан. Республикада, эң ылаңгыя Кызыл хоорайда, бензин өртээ оон-даа өзерин «Роснефть» компанияның ийи станциязы болдурбас аргалыг бооп турар. Тываның Баштыңы Владислав Ховалыг «Роснефть» компаниязының удуртулгазы-биле дугуржуп, ооң станцияларын эрткен чылда Кызылга туттурганын “өттүр көрген” хемчег ышкаш кылдыр санап болур. 7-8 шак-даа дургузунда оочурга тургаш (июль 18-тиң хүнүнде өртек-биле) чолаачылар А-92 марканың бензинин 1 литрде 67 рубль 70 көпеек, А-95 марканы 1 литрде 71 рубль 25 көпеек-биле садып кудуп алыр аргалыглар.
Республиканың Чазааның медээлери-биле алырга, Тываның Баштыңы Владислав Ховалыг регионга кывар-чаар материалдарны немей көвүдедирин «Роснефть» болгаш «Газпромнефть» компанияларның удуртукчулары-биле дугурушкан. Ол ышкаш «Лукойл» компания-биле шак-ла ындыг дугуржулга ооң удуртукчузу Сергей Кочурков-биле ужуражылга үезинде чедип алдынган. Чайгы болгаш күскү көдээ ажыл-агый сезоннарында мал чемин белеткеп алырынга, дүжүттү ажаарынга херек дизель кывар чүүлү-биле «Лукойл» компания дузалаар дугайында Владислав Ховалыг дыңнаткан.
/ Ш. МОҢГУШ.
Авторнуң тырттырган чуруу.
“Шын” №28 2026 чылдың июль 23
"Шын" солуннуң МАХ-каналынга каттыжыңар: max.ru/channel_shyn