Баш удур Чаңгыс аай күрүне шылгалдаларын пятницадан эгелээш апрель 22-ге чедир барык 3 муң доозукчу дужаар. Бөгүнден эгелеп география болгаш чогаал эртемнеринге боттарының билиглерин доозукчулар көргүзүп эгелей берген.
“Март 22-ден апрель 22-ге чедир 2024 чылдың баш удур Чаңгыс аай күрүне шылгалдалары эртип турар. Аңаа киржири-биле шупту 2918 кижи бүрүткедип алган. ЧКШ-ти (ЕГЭ) организастап эрттирери-биле Россияның 66 регионунда 118 шылгалда эрттирер пунктуну хаара туткан” – деп, Россияның өөредилге-хайгаарал албаны журналистерге дыңнаткан.
Албан чериниң медээлери-биле алырга, баш удур дужаар эң-не нептереңгей эртемнерге орус дыл, албан дужаар болгаш профильдиг математика, ниитилел эртеми, биология болгаш англи дыл хамааржыр.
Ооң мурнунда РФ-тиң президентизи Владимир Путин Федералдыг хуралга кыйгырыынга 2024 чылдан тура чаңгыс эртемге ЧКШ-ти (ЕГЭ) катап дужаап болур арганы киирерин дааскан. Доозукчулар ол арганы июнь айдан тура ажыглап болур дээрзин Россияның өөредилге-хайгаарал албанының удуртукчузу Анзор Музаев ооң соонда дыңнаткан. Баш удур дужаап турар доозукчуларга ындыг арга көрдүнмээн.
Оон аңгыда Россияның өөредилге-хайгаарал албаны ада-иелер боттары амы-хуузунда шенелде ЧКШ-ке (ЕГЭ) киржип, шылгалданың дүрүмнери болгаш канчаар эртери-биле танышкаш, ажы-төлүнге тайылбырлап бээр аргалыг болур кылдыр “Кады дужаалы” деп акцияны чогааткаш, боттандырган.
Тываның өөредилге сайыдының оралакчызы Ольга Якушеваның чугаалап турары-биле алырга, ол акция уругларның болгаш ада-иелерниң кайызынга-даа ЧКШ (ЕГЭ) дээрге коргунчуг эвес дээрзин билиндирип, сагыш-сеткилин оожургадырынче угланган.
“Бо чылын бис төөгү эртеминге шылгалда дужаар бис. Эрткен чылын ада-иелер болгаш чон орус дылга шылгалданы бижээн. Тывада шак бо хемчегни эрттирери-биле 25 пункт ажыттынган. Бо хүнде ада-иелер төөгү эртеминде боттарының билиглерин хынаар аргалыг. Бистиң амгы чурттап чоруур байдалывысты улуг-даа, бичии-даа улус төөгүнүң шын арыннарын сактыры чугула. Бистиң дайзыннарывыс бөгүн оларны болдунары-биле хажыдарын кызыдарлар” – деп, Тываның өөредилге яамызының оралакчызы чугаалаан.
Акция 8 дугаар чыл уламчылап турар. Бир дугаар 2017 чылда болган. Эрткен чылын аңаа бүдүн республикадан 300 кижи киришкен болза, а бо чылын барык 900 кижи киржирин манап турар. Ада-иелер шылгалданы бүрүнү-биле канчаар дужаарын боттарының кежинге көргеннер. Шылгалдага канчаар бүрүткедирин, аудиторияларга чара олуртурун, күрүне шылгалдазының киржикчилериниң олуттары кандыг болурун база оон-даа өске чүүлдерни билип алганнар.
Чуруктарны интернет четкизинден алган
