Август 22-де бүгү чуртта Россияның күрүне тугунуң хүнүн демдеглеп турар.
Россия Федерациязының күрүне тугунуң хүнүн 1994 чылда доктааткан. Туктуң үстүү талазында ак өң – ачы-буянныг ак сеткилди, ортузунда көк өң – шынчы чорукту, адаа талазында кызыл өң – күштү болгаш маадырлыг чорукту илередип турар.
Владимир Путин Россияның Президентизи апарган соонда күрүнениң сүлде демдектериниң ужур-утказынче шыңгыы кичээнгей салып, ону чон ортузунга тайылбырлап, Россия Федерациязының күрүне тугунуң хүнүн демдеглеп эрттирип эгелээн.
Күрүне тугунуң хүнүн демдеглеп эрттирери – российжи күрүнениң күчүзүн илереткен чугула политиктиг болуушкун.
Тывага байырлал Россия Федерациязы биле Тыва Республиканың күрүне туктарын көдүрер езулал-биле эгелээр.
Тываның Баштыңы Владислав Ховалыг байырлыг езулалдың киржикчилеринге болгаш республиканың чонунга байырын чедирген соонда, 14 хар четкен сургуулдарга паспорттарны тыпсыр.
Ооң-биле чергелештир Россияның күрүне тугунуң хүнүнге тураскааткан янзы-бүрү хемчеглер республиканың хоорай, кожууннарынга эртер: Россияның тугун киискиткен «автопробег», «Дөгээ» даанче күрүне тугун үндүргеш, киискидер, уругларның кадыкшылга лагерьлеринге Россия Федерациязы биле Тыва Республиканың күрүне туктарын көдүрер езулалдар, Аныяктар сесерлиинге «Street Workout» кудумчу спортунуң турнири, хоочуннар бажың-интернаттарынга өөредиглиг беседалар, викториналар болгаш флешмобтар, социал четкилерге «Ак, көк, кызыл» деп видеороликтиг көргүзүг, Аныяктар сесерлиинге «Мээң күрүнемниң тугу» деп оюн-тоглаалыг концерт, «Триколор» ленталарын үлээр, Национал паркка флешмобтар дээш оон-даа өске.
Бистиң корр.