Тыва Республиканың Чазааның айтыышкыны-биле август 1-ден сентябрь айның 20-ге чедир Тываның бүгү девискээринге мал чеминиң белеткелиниң шалыпчы айын чарлаан.
Мал чеминиң белеткелин организастыг чорудар талазы-биле ведомстволар аразының ажылчын штавын тургускан. Ажылчын штабтың составынче Тыва Республиканың Чазааның Даргазының оралакчызы У.А. Ондар, республиканың көдээ ажыл-агый сайыды Ю.Д. Оруспай, “Росагрохим” федералдыг күрүне албан чериниң регионда эргелелиниң удуртукчузу А.В. Докан-оол, агаар-бойдус хайгааралының федералдыг албан чериниң Тывада төвүнүң начальниги А.П. Ляпин болгаш кожууннарның чагыргаларының даргалары кирген.
Мал чеминиң белеткелин организастыг чорударының планын тургускан. Ол планда мал чеминиң белеткелинге кожууннарның бо чугула кампанияга ажыл-чорудулгазы хамаарылгалыг албан черлериниң кылып чорудар ажылын тус-тузунда тодаргайы-биле хувааган.
Баш бурунгаар санаашкыннар-биле алырга, 2026–2027 чылдың кыжында кыштаглаашкынче республикага 225 750 баш санныг мал-маган кирер ужурлуг. Ол малга ниитизи-биле 221 005,1 тонна мал чемин белеткээрин планнаан.
Кожуун бүрүзүнүң бо чайын белеткээр ужурлуг мал чеминиң хемчээли ТР-ниң Чазааның айтыышкынында тодаргайы-биле айыттынган. Чижээлээрге, Тывада эң хөй мал-маганныг Кызыл кожуун 27 462 санныг малынга 27 462,4 тонна мал чемин белеткеп алыр ужурлуг. 24 999 баш санныг малдыг Барыын-Хемчик кожуун– 24 999,2 тонна, Чөөн-Хемчик кожуун 18 700 малынга – 18 700,5 тонна.
Эрткен 2025 чылда Тывага мал чеминиң белеткелин агаар-бойдустуң кааңдаашкыны бергедеткен. Мал чеминиң белеткелин организастыг чоруткан көдээниң ажыл-ишчилериниң шудургу ажылының ачызында 215 тонна мал чемин 2025-2026 чылдарның мал кыштаглаашкынынга белеткеп ап шыдаан. Ол дээрге планның 98,9 хуузу – план колдуунда күүсеттинген.
Бо чайын мал чеминиң белеткели база белен эвес байдалда эртери агаар-бойдустуң кааңдаашкынныг болганындан илдең. Аңаа көдээ ажыл-агый техниказынга кывар-чаар материалдар айтырыы база доктар бооп болур.
Ш. МОҢГУШ.
Чурукту “ТываМедиаБөлүк” ИА-дан алган.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn