Республиканың школачылары май байырлалдарының дыштаныр хүннеринде ажыктыг болгаш буянныг ажылдарга киришкеннер. Оолдар, уруглар ёзулуг патриотчу болгаш харыысалгалыг чоруун көргүскеннер.
Бай-Тайга кожууннуң Бай-Тал болгаш Шуй школаларының өөреникчилери улуг назылыгларга деткимче көргүзер сорулга-биле күш-ажылдың хоочуну Сергей Чогээниң аалынга четкеннер. Олар хой кажаазының өдээн коптарар эң-не берге боорда, кол ажылын кылганнар.
Тес-Хем кожууннуң өөреникчилери субботниктерже демнии-биле үнгеннер. Самагалдайның өөреникчилери школаларының девискээрлерин аштап-арыглааш, тус черниң хүрээзин чаартыр болгаш дозулаар ажылдарга идепкейлиг киришкеннер.
Берт-Даг школазының өөреникчилери база идепкейин көргүскеннер. Олар школазының теплицазынга бирги ногааларны тарааннар. Ол ышкаш көдээ аалга чедип, малчыннарның амыдыралы-биле таныжып, ажыл-агыйынга дузалашканнар.
Шак-ла мындыг идепкейжи чоруктар уругларны демнештирер, улуг салгалдарга деткимче көргүзеринге өөредир, хүлээлге деп чүүлге, күш-ажылга кижизидер база төрээн чуртунга ынакшылды оттурар. Школачыларның буянныг чоруу үлегер болгаш чаагай чаңчылдар болуп артып каарын күзээр-дир бис.
Бистиң корр.
Чуруктарны Өөредилге яамызындан алган.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...