Бир эвес силер сагыш-сеткилиңерниң дүвүрелинге күш четпейн турарыңарны билип каар болзуңарза, таптыг боданыры-биле сула салдынарын оралдажыры чугула. Бодунга дузалажыры-биле дараазында бөдүүн болгаш дээштиг аргаларны ажыглаарын эмчилер сүмелеп турар.
Соок сугдан ижер. Стресс дээрге организмниң девиденчиг байдалга удур туржуп турары. Суг организмде аргыжылганы өйлеп, дорт болгаш доора утказында организмни сериидедиптер. Сугну оожум, бичии-бичии пактар-биле ишпишаан, кичээнгейни ынаар угландырарга эки.
Үндүр-киир тынар. Стресс үезинде тыныжывыс кыскалап азы шуут тынмайн барганы ышкаш, туруптуп болур. Элээн узун кылдыр үндүр-киир тыныңар. Болдунар болза, карактарыңар шимгеш, кайнаар-даа чардыкпайн, тыныжыңарже бүгү-ле кичээнгейиңерни угландырыптыңар. Киир тынып тургаш, кандыг-ла-бир чылыг, чырык, чаагай агаар-биле долуп турар кылдыр сагыштаптыңар. А үндүр тынып тургаш, багай чүүлдер, сагыш-сеткил, бодалдар силерден куу азы кара ыш хевирлиг үнүп турарын сагыжыңарга чуруптуңар.
Эрестиг шимченип азы агаарлаптыңар. Базымнарыңар санап, тыныжыңар хайгаарап, адыштарыңар часкап, азы кандыг-бир кичээнгейиңерни мөөңнептер шимчээшкинден кылыңар. Ынчан силерниң угааныңар багай бодалдардан чардыга бээр.
Бодуңарны массажтаптыңар. Адыштарны болгаш салааларны экидир нугуур. Стрессти оожургадыптар точкалар үстүкү эринниң кырыкы болгаш адаккы эринниң адаккы кезээнде дап-дал ортузунда болур. Ол 2 точканы чаңгыстап азы иелдирзин деңге 2–3 минута дургузунда нугуур.
ТР-ниң Хөй-ниитиниң кадыкшылга төвүнүң медээлеринден белеткээн.
«Шын» №77 2023 чылдың октябрь 11