Дүүн, май 2-де, Бай-Тайганың Бай-Талга РСФСР-ниң база Тыва АССР-ниң улустуң артизи Хүргүлек Коңгарның 100 чыл оюнга тураскааткан “Мөңгүлектиң айлаң кужу” деп мөөрей болуп эрткен. Аңаа республиканың аңгы-аңгы булуңнарындан 37 ыраажы киришкен.
Киржикчи бүрүзү ийи ыры ырлаан – улустуң ырызы болгаш хостуг стильге. Мөөрей киржикчилериниң эң улуг назылыы Кызыл хоорайдан 73 харлыг Екатерина Намчыл болган.
Солун мөөрейниң жюри кежигүннери “Салчак” чогаадыкчы хөгжүм лабораториязының удуртукчузу, Тываның улустуң артизи Борис Салчак, Тываның чогаалчылар эвилелиниң даргазы, шүлүкчү Сайлыкмаа Комбу болгаш Бай-Тайга кожууннуң Культура эргелелиниң даргазы Сайын Күжүгет киржикчилерниң аразындан тиилекчилерни илереткен.
“Мөңгүлектиң айлаң кужу” мөөрейниң дээди шанналын Бай-Тайганың Бай-Талдан Чайнита Даржаага тывыскан. Мөөрейниң I-ги, II-ги, III-кү чергениң дипломнарын Шуй суурдан Айдаана Хомушку, Ак-Довурак хоорайдан Ай-Херел Куулар, Мөңгүн-Тайга кожуундан Даң-Хая Хертек тус-тузунда алганнар.
Көрүкчүлер оларның онзагай талантызын диңмиттиг адыш часкаашкыннары-биле уткуп турган. Мөөрейге киржикчилер шыырак белеткелдиин көргүзүп, уран талантызын бараалгатканнар.
Онзагай хемчегге сураглыг артистиң ажы-төлү, оглу Валерий Конгар, керни ТР-ниң Дээди Хуралының депутады Алдын-кыс Коңгар, уйнуктары база чоок төрелдери киришкеш, авазының төрүттүнген черинге, чонунга бедик йөрээлдерни кылып, эки күзээшкиннерни сөңнээш, келир үеде бичии чаштарга дуза кылдыр уруглар ойнаар шөлчүгешти тургузуп бээрин аазааннар.
Оон аңгыда, Тываның В.Көк-оол аттыг Национал хөгжум-шии театрының артистери база киришкен. Олар хундулуг өгбези болур Хүргүлек Конгарның дугайында чылыг сактыышкыннарны кылып, театрның сценазынга ооң ойнап чорааны кол рольдарын, өткүт онзагай үнү-биле ырлап чораан ырларын чонга бараалгатканнар.
ТР-ниң улустуң артизи Анзат Кууларның аныяк үелеринде Конгар Хүргүлек-биле эгин-кожа ажылдап, чаңгыс кудумчуга чурттап чораанын, ооң кижилерден бир онзагай овур-хевирин, аажы-чаңын сактып, аңаа мөгейип чугаалаанын чон аажок сонуургаан.
Бистиң корр.
Бай-Тайга кожууннуң медээзи-биле
