Тускай шериг операциязының хоочуннарының болгаш киржикчилериниң кадыкшылын үе-шаанда шинчилээри болгаш оларга эмчи дузазын чедирери – кадык камгалал системазының чугула угланыышкыннарының бирээзи. Кол кичээнгейни бүгү талалыг шинчилгелерже, бот-тускайлаң деткимчеже болгаш аарыгны эртежик илередиринче угландырган. Ооң ачызында аарыгны улаштыр эмнээр аргаларын дүрген тодарадып, аарыг кижилерни тускай эртемниг специалистерже чорудар.
“Ада-чурт камгалакчылары” күрүне фондузунуң болгаш Россияның Кадык камгалал яамызының кады эгелээшкини-биле тускай шериг операциязының хоочуннарының диспансеризациязын организастап турар. Бүгү талалыг шинчилге аарыгны баштайгы чадазында-ла илередип, аарыг кижилерни тускай эртемниг эмчилерже дүрген чорудар арганы бээр.
“Тываның девискээринче ТШО киржикчизиниң чедип келгениниң дугайында медээ келген соонда, бир ай дургузунда диспансеризацияны чорудар. Бистиң поликлиникада диспансеризацияны ажыл хүннеринде 14 шактан 19 шакка чедир чорудуп турар. А субботада — 8 шактан 14 шакка чедир. Диспансеризация ийи чадалыг эртер. Бирги чадазында ТШО киржикчизиниң бодунга психолог эмчи консультацияны албан чорудар, ол ышкаш көргүзүглериниң аайы-биле тускай специалистер база консультацияларны кылыр. Дараазында бирги чадазының түңнелдери-биле пациентини ийиги чадазынче шилчидер. Оон диспансеризацияның түңнели-биле ТШО киржикчизин санаторий-курортче чорудар” — деп, Республиканың консультация-диагностика төвүнүң терапевт эмчизи Байджамена Болаа чугаалаан.
Эрткен чылын 100 муң хире кижи эмчи шинчилгезин эрткен. Ооң түңнелинде 80 муң ажыг аарыглар тодараттынган, оларның 20 муңундан аарыгны бир дугаар илереткен. Ол чүүл аарыг кижилерни үе-шаанда немелде хыналдаже чорудуп, херек эмнээшкинни эгелээр арганы берген.
Фондунуң кол сорулгазы – тускай шериг операциязының хоочуннарынга болгаш оларның өг-бүле кежигүннеринге бот-тускайлаң деткимчени көргүзери. Специалистер болгаш социал координаторлар эмчи болгаш социал реабилитация, өөренир болгаш ажылче хаара тудар талазы-биле дузалажып, юридиктиг деткимчени көргүзүп турар. Оон аңгыда кадыының байдалы кызыгаарлыг улустуң чурттаар оран-савазының болгаш бажыңынга үр үеде ажаап карактаарының айтырыгларын фонд шиитпирлежип турар.
«Диспансеризация дээрге дайынчыларны санаторий-курорттарже эмнедип чорударынга эртер ужурлуг эмчи реабилитациязының чугула чадазы-дыр. Ол ышкаш диспансеризация эртип турар үеде патологтуг болгаш хоочураан аарыгларны илередир. Чамдык аарыгларны эге чадазында когун үзе эмнеп болур» — деп, «Ада-чурт камгалакчылары» фондунуң социал координатору Херел Куулар чугаалаан.
Тускай шериг операциязының киржикчилери чылдың-на эмчи шинчилгезин эртер ужурлуг. Бүгү талалыг шинчилге аарыгларны үезинде илередип, херек эмнээшкинни эгелээринге болгаш аарыгларның нарын чадаже шилчиирин болдурбазынга дузалаар. Эмчиниң доктаамал хайгааралы кадыкшылын быжыглаар оруктарны тодарадып, чогуур санаторий-курорт эмнээшкинин шилип алыр арганы бээр.
Бистиң корр.
Чурукту “Ада-чурт камгалакчылары” күрүне фондузунуң Тывада салбырының социал четкиде арнындан алган.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn