Россияның Социал фондузунуң Тыва Республикада эргелели бо чыл эгезинден тура ниитизи-биле 74 сая рубль түңнүг тускай социал төлевирни 3615 эмнелге ажылдакчызынга доктааткан.
Ук төлевирни кадык камгалалының бирги звенозунуң, кожууннарның төп эмнелгелериниң, кожууннарның болгаш участок эмнелгелериниң, дүрген дуза чедирер станцияларның болгаш салбырларның ажылдакчыларынга бээри көрдүнген. Кижи бүрүзүнге төлевирниң түңү аңгы-аңгы. Ол специалистиң категориязындан болгаш эмнелге албан чериниң хевиринден хамааржыр. Чижеглей алырга, 4,5 муңдан 50 муң чедип болур.
Россияның Президентизиниң даалгазы-биле 2024 чылдың март айдан тура бичии хоорайларда, кожуун төптеринде болгаш суурларда ажылдап турар эмнелге ажылдакчыларының тускай социал төлевирлериниң хемчээлин өстүрген.
50 муңдан эвээш эвес чурттакчылыг суурларда кожуун болгаш участок эмнелгелериниң, поликлиникаларының база өске-даа бирги звенонуң эмнелге черлериниң эмчилеринге социал төлевирниң хемчээли 50 муң, а ортумак эмнелге ажылдакчыларынга 30 муң рубль чедир өскен.
50-ден 100 муң чедир чурттакчылыг черлерниң эмчилеринге социал төлевирниң түңү 29 муң, ортумак эмнелге ажылдакчыларынга 13 муң болур. Төлевирниң өстүрген хемчээлин март айдан тура доктааткан. Баштайгы өстүрген төлевирни апрель айда алганнар.
Ук акша-хөреңгини Тыва Республиканың Социал фонд эргелели эмнелге албан черлериниң медээлеринге даянып алгаш төлээр. Ай санында эмнелге албан черлери тускай социал төлевир алыр эргелиг ажылдакчыларының электроннуг даңзызын тургускаш, регионалдыг салбырже дамчыдар.
Билдинмес айтырыглар бар болза, Тыва Республикада Социал фонд салбырының регионалдыг контакт-төвүнче долгапкаш, айтырып ап болур: 9-61-88. Ажыл хүннеринде 09.00 шактан 18.00 шакка чедир ажылдаар.
Тывада Социал фонд салбырының медээлеринден Ч.СААЯ белеткээн.
Чуруктарны интернеттен алган.
“Шын” №29 2024 чылдың апрель 17
