Тыва дыл хүнүнге тураскааткан хемчеглер

Ноябрь 1-де Тываның улустуң чогаалчызы Александр Даржайның бот-идепкейи-биле 2016 чылда доктаадып тургускан Тыва дыл хүнүн бо чылын база демдеглээр бис. Чыл санында бүгү республикага Тыва дыл хүнүнге тураскааткан янзы-бүрү хемчеглерни организастаары чаңчыл болган: тыва дылга диктантылар, уран номчулга мөөрейлери, «төгерик столдар», конференциялар, национал идик-хепке фото-чуруктар мөөрейлери дээш оон-даа өске.

Октябрь 20-ден 24-ке чедир Национал школа хөгжүдер институт болгаш «Чаш назынның навигаторлары» деп федералдыг төлевилел боттандырар регионалдыг курлавыр төвүнүң удуртулгазы-биле «Үш үне» деп республика чергелиг этнокультурлуг диктантыны организастаан. Аңаа школачылар, студентилер, аныяктар, ажылчын коллективтер болгаш күзелдиг кижилер киришкен. Диктантының түңнелин Тыва дыл хүнүнде түңнээш, тиилекчилерин ТР-ниң Өөредилге яамызының хүндүлел бижиктери-биле шаңнаар.

Октябрь 27-де Тываның күрүне университединиң филология факультединге Тываның улустуң чогаалчызы Степан Сарыг-оолдуң 110 харлаан юбилейинге тураскааткан чаңчылчаан «Сат номчулгалары» болган.

Октябрь 31-де А.С. Пушкин аттыг национал библиотекага «дыл – литература – культура» деп республика чергелиг чурт-шинчилел номчулгалары болур.

Октябрь 31-де 10.00 шактан 13.00 шакка чедир Тываның гуманитарлыг болгаш тускай социал-экономиктиг институтка (ТГТШИ) Тыва дыл хүнүнге тураскааткан шөлчүгештерниң ажылын организастаар: «төгерик столга» сайгарылгалар болгаш тыва дыл шуулганынга киирер саналдарны ажылдап кылыр.

Октябрь 31-де ТГТШИ-ге 14.00 шактан 17.00 шакка чедир Степан Сарыг-оолдуң 110 харлаанынга тураскааткан эртем-практиктиг конференция болур.

Ноябрь 1-де Улусчу чогаадылга бажыңынга 14.00 шактан 16.00 шакка чедир «Тыва дыл – чоннуң өнчүзү» деп VIII республика шуулганы болур.

Ноябрь 3-те Тываның өөредилге сайзырадыр болгаш мергежил бедидер институтка башкылар аразынга республика чергелиг тыва чогаалчыларның чогаалдарынга поэзия кежээзи болур.