Москвада Тываның бүрүн эргелиг төлээ чери Москвада болгаш Москва облазында эмнээшкинни эртип турар ТШО-нуң киржикчилеринге хүн бүрүде дузаны көргүзүп турар. Дүүн төлээ чериниң ажылдакчылары дайынның хоочуннарының госпитальдарынга чедип чорааннар, а ол ышкаш бөгүн Москвада эмнээшкинни эртип турар 28 дайынчыга байыр чедириишкинин дамчыдып, Санкт-Петербург хоорайда эмнээшкин эртип турар дайынчыларны деткиири-биле чорупканнар.
Тывадан чоруткан белектерни база ооң иштинде Тываның политехниктиг техникумундан белектерни дайынчыларга тывыскан. Балыглаткан дайынчылар тускай катап тургустунуушкун идик-хептерин, а ол ышкаш тыва боорзактарны, эм оъттардан кылган шайларны, ханды суксуннарны алганнар. Шериг албанныг бүрүзүнге Тыва Республиканың бүрүн эргелиг төлээ чериниң даргазы Чечен Чоксумнуң адындан байырны чедирген.
Тиилелге Хүнү — бистер бүгүдеге онзагай, уттундурбас, улуг ужур-уткалыг байырлал. Бүгү дайынчыларга мага-бот болгаш сеткил-сагыш кадыкшылын күзедивис, а бистиң өөрүп четтириишкинивис болгаш хүндүткеливис силер-биле кады. Бүгү балыглатканнарга дүрген сегиирин күзедивис. Улуг Тиилелегениң кел чыдар Хүнү-биле!
