Республиканыӊ чедери берге суурларында социал албан черлеринге одаар чүүл чедирер ажылдыӊ 70 хуузу күүсеттинген дээрзин Чуртталга-коммунал ажыл-агыйыныӊ яамызы бөгүн дыӊнаткан.
– Соӊгү чүктүӊ чедирилгезин бо чылын эртежик, июль айда, эгелей берген бис. Бо сөөлгү ийи чылда одаар чүүлдүӊ чедирер хуусаазын узатпайн, четтигип шыдап турар бис – деп, Чуртталга-коммунал ажыл-агыйыныӊ сайыды Мерген Мынын-оол тайылбырлаан.
Агаар-бойдузунуӊ аайы-биле чүък чедирери бергедежи бээр суурларга соӊгу чүктүӊ чедирилгези-биле хөмүр-дашты чылыг үеде чедирер. Шак ындыг черлерни Россияныӊ Чазааныӊ доктаалы-биле тодарадып каан. Тываныӊ 13 кожууннарында 30 хире суурларже хөмүр-дашты соӊгу чүктүӊ чедирилгези-биле сөөртүр.
Барыын-Хемчик, Улуг-Хем, Чаа-Хөл, Чеди-Хөл, Чөөн-Хемчик болгаш Бай-Тайга кожууннарда ол ажыл доозулган. Өвүр, Кызыл, Каа-Хем, Мөӊгүн-Тайга, Тес-Хем, Сүт-Хөл, Эрзин кожууннарже хөмүр-дашты ам-даа улаштыр чедирер дээрзин Одаар чүүл болгаш энергетика яамызы медеглээн.
Тываныӊ суурларынга 16 муӊ тонна хөмүр-дашты соӊгу чүк чедирилгези-биле аппарып бээр. Ол дээрге 129 социал албан черлериниӊ одаар чүүлү болур. Хөмүр-даш садып алыры-биле кожууннарга субсидия кылдыр 61 млн. ажыг рубль акша-хөреӊгини республика бюджединден үндүрүп берген.
– Чоннуӊ хөмүр-дажын одаар чүүлдүӊ складтарынга бөгүн чедирип эгелей бердивис. Ону март айга чедир уламчылаар. 200 муӊ ажыг тонна хөмүр-дашты 33 складка чедирерин планнап турар – деп, Тываныӊ Одаар чүүл болгаш энергетика сайыды тайылбырлаан.
«Социал хөмүр-даш» деп төлевилелдиӊ шугуму-биле бо чылын 2971 өг-бүлеге дузалаар. 2849 өг-бүле хөмүр-даш алыр. Өг-бүле бүрүзүнге 2145 кил хөмүр-даш бээр. Тере-Хөл биле Тожуу кожууннарда122 өг-бүле ыяш алыр. Өг-бүле бүрүзүнге 4,8 кубометр ыяш бээр. Амгы үеде ыяшты дүжүрүп берип турар дээрзин регионнуӊ Одаар чүүл болгаш энергетика яамызы дыӊнаткан.
Тыва Республиканыӊ Чазааныӊ медээлеринден Р.Демчик белеткээн