Россияның экономиктиг хөгжүлде сайыды Максим Решетников чайгы турисчи сезонга белеткел дугайында Бүгү-российжи селектор чөвүлел хуралды Тыва Республиканың Чазааның бажыңынга эрттирген. Ону федералдыг төп Тывага туризмни улам сайзырадырынче улуг кичээнгейни салып турарын демдеглээни ол деп-даа санап болур.
Селектор хуралга ОБЯ-ның, ИХЯ-ның, Россияның “Россхереглелхайгаарал” албанының, РФ-тиң Транспорт яамызының болгаш Россия Федерациязының регионнарының туризмни хөгжүдеринге хамаарылгалыг яамыларның болгаш ведомстволарның удуртукчулары киришкен.
“Эрткен чылда турисчи сезон үезинде транспорттуң бүгү хевирлери-биле 39 сая туристерни аргыштырган. Баш бурунгаар санаашкыннар-биле алырга, бо чылда туристерниң саны 3,2 сая чедир көвүдээр чыгыы. Оларның 2 сая хирези 18 турисчи угланыышкыннарга аргыжар” – деп, сайыт Максим Решетников чугаалааш, туристерниң көвүдээри-биле холбаштыр оларны транспорт-биле аргыштырары чаа сезонда кол сорулгаларның бирээзи дээрзин айыткан.
Туристерниң дыштанылгазының кол угланыышкыннарынга рейстерни немээринге транспорт бүдүрүлгелери болгаш албан черлери белен турар ужурлуг деп сайыт сагындырган. Россияның “Росхереглелхайгаарал” албанының шугуму-биле далайларда, хөлдерде болгаш хемнерде турисчи маршруттарга айыыл чок чорукту хандырарының айтырыгларын сайгарып чугаалашкан. Суг объектилери-биле холбашкан турисчи маршруттарга РФ-тиң субъектилериниң шупту камгалал албан черлери аразында демниг болгаш дүрген хөделиринче шыңгыы кичээнгейни угландырган.
“Чайгы турисчи сезон үезинде отельдер болгаш аалчылар бажыңнарынга туристер хөй боор. Эрткен чылын 12,5 муң чаа өрээлдерни ажыглалга киирип, 10 хууга көвүдеткен. Отельдер биле аалчылар бажыңнарынга туристерни хүлээп алырынга бизнести билдилиг болгаш элээн калбаа-биле киириштирер ужурлуг бис” – деп, федералдыг сайыт айыткан.
Чайгы турисчи сезонга белеткел дугайында Краснодар, Приморье крайлар, Крым биле Дагестан республикалар, Калининград биле Иркутск областар дээш өске-даа регионнарның төлээлери илеткээн.
Турисчи сезонга Тывада белеткел дугайында Туризм талазы-биле агентилелдиң директору Буянзак Түлүш дыңнаткан. “Чедер” курорту удавас ажыглалга киирери, Дус-Хөл, Чагытай хөлдерге туристерниң дыштанырынга таарымчалыг байдалдарны тургусканы, сарыг шажын чүдүлгезиниң ыдыктыг черлери дамчыштыр регионнар аразында “Тыва – Калмыкия – Бурятия – Забайкалье край” турисчи маршруттарны ажылдап кылып турары дээн ышкаш келир чайгы турисчи сезонга республикада белеткел дугайында ол илеткээн.
Шалыпкын демниг кады ажылдажылга болгаш регионнар аразында селектор хуралды организастаарынга идепкейлиг дузазы дээш Максим Решетников Тыва Республиканың удуртулгазынга өөрүп четтиргенин илереткен.
РФ-тиң экономиктиг хөгжүлде сайыды чаңгыс хүннүң ажыл-агыйжы сургакчылаашкыны-биле Тывага чораанын сагындыраал. Ол сургакчылаашкын үезинде Максим Решетников республиканың социал-экономиктиг хөгжүлдези канчаар боттанып турары-биле таныжып, улуг хемчээлдиг төлевилелдерни боттандырып турар бүдүрүлгелерге болгаш тудуг шөлдеринге чораан.
ТР-ниң Чазааның парлалга албанының медээлеринден Ш. МОҢГУШ белеткээн.
“Шын” №29 2024 чылдың апрель 17
