Сөөлгү болган Аппарат хуралынга ТР-ниң Баштыңы Владислав Ховалыг час дүжерге, хар адаанга көзүлбейн чыткан боктар көстүгүлеп келирин болгаш хоорай, суурлар девискээрлерин арыг-силиг тургузары-биле, субботниктерни организастап эгелээр дугайында даалганы шупту деңнелдиң удуртукчуларынга берген.
Март айның төнчүзүнде Тываның девискээринге чылыыр, дүнелерде казыыр болур-даа болза, хүндүс кадар градус болур. Хүндүс эрээн хар дүне дедир доңгаш, оруктарга чадаг кижилерге-даа, орук шимчээшкининге-даа айыылды тургузар дээрзин Владислав Ховалыг демдеглээн. Ынчангаш хар аштаар ажылдан аңгыда, тайгыр черлерге элезин чажар ажылды идепкейжидери чугула. Кызыл хоорайның чагырга чери кудумчуларда шалбааларны сордурар ажылды күштелдирерин губернатор сагындырган. Бок ашталгазы эрте частан эгелээш, орай күске чедир үргүлчүлээр дээрзи билдингир.
2022 чылдан эгелеп, ТР-ниң Баштыңы Владислав Ховалыгның эгелээшкини-биле «Арыг хоорай. Арыг суур» деп губернатор төлевилели боттанып эгелээн. Ооң деткимчези-биле «Тыва Республиканың кожууннарында эң-не арыг болгаш чаагайжыттынган организация» деп мөөрей организациялар аразынга болуп эрткен. Ооң түңнелин эрткен неделяда чуртталга-коммунал ажыл-агый адырының ажылдакчыларының хүнүнге тураскааткан байырлыг хуралга үндүрүп, тиилекчилерге шаңналдарны тывыскан. Мөөрей 3 чыл дургузунда уламчылаары көрдүнген. Бо чылын база уламчылаар.
/ Бистиң корр.
Тывада субботниктер эгелээн
22 марта 2023
29