Вавилин ээтпээнде «Солнечная поляна» деп девискээрниң чурттакчыларын электри айтырыы хөй чылдарда дүвүредип келген. Олар эвээш эвес үениң дургузунда электри чырыы чок, караңгы черде чурттап турарлар. Электри чырыы чок-даа болза, чуртталга бажыңнары хөйү-биле немежип турарын шупту билир бис.
ТР-ниң Баштыңы Владислав Ховалыгның регионнуң чурттакчылары-биле дорт ужуражылгазының үезинде шак бо берге айтырыгны чон көдүрген. Ынчан регионнуң удуртукчузу ТР-ниң Одалга болгаш энергетика яамызынга база ук адырны харыылаар өске-даа удуртукчуларга «Солнечная поляна» девискээринче электри шугумун киирер аргаларын өөренип көөр даалганы берген турган.
Тыва Чазактың «Россети Сибирь» бүдүрүлге чери-биле сырый ажылдажылганың түңнелинде, ук девискээрже электри шугумун киирген.
Амгы үеде «Солнечная поляна» девискээриниң чурттакчылары чурттап орар оран-савазынче электри шугумун кииртип болур апарган. Кажан, каяа чагыг киирер дугайында ТР-ниң одалга болгаш энергетика сайыды Эдуард Куулар тайылбырлаан:
– «Солнечная поляна» девискээринче ниити электри шугумун киирипкен. Бажың ээлери «Тываэнергога» азы «Россети Сибирьге» чагыг кииргеш, боттарының бажыңнарынче электри шугумун билдириишкин бижээш, кандыг-даа шаптараазын чокка кииртип ап болур. Бажыңче электри шугуму кожарга ниити чарыгдал 50 муң хире рубль.
Вавилин ээтпээнде бо девискээрже электри шугуму кииреринге 70 муң сая рубль чарыгдалды үндүрген.
Бистиң корр.
"Шын" №64, 2023 чылдың август 30