Бо хүннерде республикада «Чурттаарынга таарымчалыг хоорай хүрээлеңин хевирлээри» федералдыг төлевилелдиң 2025 чылда девискээр чаагайжыдылгазы дээш онлайн-бадылаашкыннар кидин түлүк чоруп турар.
Солуннуң бо үндүрүлгезинде Тываның ыраккы ийи кожуунун таныштырар-дыр бис.
Ыраккы Тере-Хөл кожууннуң чурттакчы чону бо чылын ийи төлевилел дээш онлайн-бадылаашкында киржип турар.
Куңгуртуг суурга спортчу шөл тургузар төлевилелди ажылдап кылган ужуру — суурда спортчу, тренажёрлуг залдар чогу. Кожуун төвүнде чүгле уруглар ойнаар шөлчүгештер бар, а чурттакчы чонга спорт болгаш күш-культура-биле өңнүктежир черлер чок. Ынчангаш бир дугаар төлевилелде аңгы-аңгы хевирниң турниктери, пресс кылыр узун сандайлар, скейтборд, чадаг-терге конструкциялары көрдүнген. Спортчу шөлдү «Воркаутка ынак мен» деп конструкция каастаар (Воркаут — кудумчу гимнастиказы. Англи дылдан очулдурарга, «тренировка» дээн).
Ол ышкаш ада-иелерге ажы-төлүн хайгаарап олурар узун сандайларны база тургузар. Ол девискээрни долгандыр демир сетка-биле херимнээр. Спортчу шөл дээш куңгуртугжулар 20 кижи соңгаан (апрель 2-ниң көргүзүү-биле).
Ийи дугаар төлевилел — «Чыргалаң» сарыг шажын хүрээзин чаагайжыдары. Ук хүрээ Куңгуртуг суурнуң Дружба кудумчузунда турар. Хүрээни долгандыр ыяштар, чечектер тарыыр, сандайлар тургускаш, ол девискээрни чырыдар, кижи кылаштаар оруктарны плиткалаар. Ол ышкаш аңаа мани-хүртүнү база тургузар. Бок октаар контейнерни аңгы херимнээр. Бо төлевилелди 602 кижи деткээн.
Тожу кожууннуң чурттакчылары чаагайжыдар 2 девискээри дээш аажок идепкейлиг соңгуп турар.
Доора-Хемниң чурттакчылары дайынчы хөделиишкиннерге киржип тургаш амы-тынындан чарылган маадырларынга тураскааткан «Алдар аллеязын» тургузары дээш 1420 кижи үнүн берген (апрель 2-ниң көргүзүү-биле). Бо аллея хоочуннарның болгаш оларның өг-бүлелериниң, эш-өөрүнүң чыглыр чери апаар. Ол ышкаш аңаа янзы-бүрү хөй-ниити болгаш культурлуг хемчеглер эрттирери көрдүнген.
Адыр-Кежигниң чурттакчыларының үнү доора-хемчилерге каш-ла сан четпейн турар-дыр — 1279 үн. Суурже кирер Аңчы кудумчузун фонарьлар-биле чырыдып, узун сандайлар болгаш «Адыр-Кежиг» деп стелланы тургузар. Чаагайжыткан девискээр суурнуң эң-не онзагай, чараш чери болур.
Онлайн-бадылаашкынга киржирде, https://17.gorodsreda.ru онлайн-платформаже киргеш, төлевилелдер-биле таныжып, таарышканы объект дээш бодунуң үнүн бээр. Азы болза, хөй-ниити черлеринде ажылдап турар волонтёрларның дузазын база ап болур.
Алдынай СОЯН
«Шын» №25 2024 чылдың апрель 3
