Найысылалдың чурттакчы чонунуң саны чылдан чылче көвүдеп, уруглар садтары, школалар, эмнелгелер чедишпестеп эгелээн. Ынчангаш чурттакчы чонга амыдыраарынга таарымчалыг байдал нарыыдап келген. Чижээлээрге, эмнелгелер-дир. Кызылдың мурнуу талазында «Южный» микрорайоннуң чурттакчылары хоорайның чөөн талазында 2 дугаар поликлиникага эмчилеп, хоорайның бир ужундан өске ужунче чоруп турарлар. Бо бүгү байдал аарыг кижилерге, чаш ажы-төлдүг иелерге, ылаңгыя назылап кыраан хоочуннарга хөй чылдар дургузунда эң-не берге байдалды тургузуп келген.
Сөөлгү үеде республикада чаа тудуглар немежип, уруглар садтары, школалар, эмнелгелерниң удаа-дараа ажыттынып, ажыглалче кирип турарын чон эскерип тур боор. Сентябрь 16-да найысылалдың мурнуу талазында «Южный» микрорайонунда аарыгларны шинчип тодарадыр, консультация бээр Медицина төвүн байырлыг байдалга ажыткан. Ооң-биле чергелештир көжүп чоруур фельдшер-акушер пунктуларынга 18 автомашинаның дүлгүүрлерин база тывыскан. 18 машинаның 2-зи чедери берге, ыраккы Мөңгүн-Тайга болгаш Тере-Хөл кожууннарга баар.
Аңаа ТР-ниң Баштыңының албан-хүлээлгезин түр үеде күүседип турар В. Ховалыг, Төп шериг округунуң төлээзи, генерал-майор Геннадий Тучин, ТР-ниң кадык камгалал сайыдының хүлээлгезин күүседип турар Анатолий Югай дээш өскелер-даа кээп киришкен.
Чаа ажыттынган эмнелгеге хүнде 300 хире пациентини хүлээп, шинчиир. Баш, хөрек, чүрек, хан-дамыр, хоралыг ыжыктар дээн ышкаш сөөлгү үеде нептереп турар аарыгларны бо эмнелгеге тодарадып болур. Чүге дээрге бо эмнелге амгы үениң эң дээре дээн херекселдери-биле дериттинген. Аңаа амдыызында «Южный» микрорайонунуң чурттакчылары эмчилеп болур. А хоорайның өске поликлиникаларынга хамааржыр улус бодунуң участогунуң ат салган бижии-биле ук эмнелгениң чаа дериг-херекселинге шинчидип ап болур аргалыг.
Төп шериг округунуң төлээзи Геннадий Тучин сөс алгаш: «Россияның Камгалал яамызының тудуп бергени Хөй ажыл-чорудулгалыг медицина төвү эмчи шугумунга болгаш бөдүүн чонга кончуг ажыктыг болур боор деп идегеп тур бис» – деп чугаалаан.
Бо эмнелге төвүнге УЗИ, рентген, лабораторлуг шинчилгени, компьютерлиг томография дээш өске-даа шинчилгени эртип ап болур. Россияда эң күштүг томографияларның бирээзин ук төпте эккеп салган дээрзин демдеглеп каалы. Бо херексел-биле хоралыг ыжыктар аарыын эң эге чадазында безин тодарадып тып болур.
Кызыл хоорайның 2 дугаар поликлиниказының кол эмчизи Долаан Калбак:
– Бир-ле дугаарында ТАР-ның 100 чыл болган оюнда биске, чаңгыс чер-чурттугларынга, кайгамчык белекти бергени дээш РФ-тиң Камгалал яамызынга өөрүп четтиргенимни илередиксеп тур мен. Бо төп «Востокта» хоорай поликлиниказының салбыры болур. «Южный» микрорайоннуң чурттакчылары маңаа хамааржыр апаар. Бөгүн дораан-даа пациентилерни хүлээп ап болур бис, ынчалза-даа тудуг болгаш документ талазы-биле ам-даа чедир кылыр бичии ажылдар бар. Пульмонолог, кезер эмчи, нейрохирург, кардиолог, хан-дамыр кезер эмчи дээш шупту эмчилер маңаа бо төпке хүлээп эгелээр. Чоорту чүгле «Южный» микрорайоннуң эвес, а хоорайның, харын-даа мырыңай республиканың чону бодунуң эмчизиниң ат салган бижии-биле шинчилгени эртип ап болур апаар – деп чугаалады.
Байырлыг ажыдыышкынга «Южный» микрорайоннуң чурттакчы чону база кээп, сонуургап, өөрүп четтиргенин илередип турду. Найысылалга аарыгларны шинчип тодарадыр, консультация бээр төп дугайында 2021 чылдың апрельде чугаалажып эгелээн. Июнь айда тудуп эгелээш, сентябрьда дооскан. Удавас ажыглалче кирер.
Айдың ОНДАР.
Буян ООРЖАКТЫҢ тырттырган чуруктары.
#Кадыкшыл #Кадыккамгалаляамызы #ФАП_тар #Тыва #Тува #Тувамедиагрупп #Тывадыл #Тывамедээ #Tuva #Shyntuva
