«Культура» национал төлевилелдиң ачызында Сүт-Хөл кожууннуң Ишкин суурда Культура одааның септелгезин эгелей берген.
Ук Культура бажыңын 1989 чылда ажыткан ояар чаңгыс-даа капиталдыг септелге кылдынмаан турган. Ниитизи-биле 1330 дөрбелчин метр бажыңның септелгезинче 13 сая рубль көрдүнген.
Эрткен дыштаныр хонуктарда ТР-ниң Культура сайыдының албан-хүлээлгезин күүседип турар Алдар Тамдын Ишкин суурга «Атлант» тудуг организациязының ажылдакчылары-биле ужурашкан. Бригадирниң чугаазы-биле алырга, бо чылдың апрель айда тудуг ажылдары эгелей берген. Одалгага херектиг тууйбулар, рубероид, ротгипс, цемент болгаш манзалар дээш септелге ажылынга херектиг материалды эккеп дүжүрүп берген. Ниитизи-биле 14 кижи тудугда ажылдап турар. Септелге ажылында Ишкин сумузунуң чурттакчылары база киржип турар.
Бөгүнге чедир кылган ажылдың шынары багай эвес. Культура яамызы болгаш Сүт-Хөл кожууннуң чагырга чери септелге ажылы күске чедир доосту бээр дээрзинге идегеп турар.
#Националтөлевилел #Культура #Сүт_хөлкожуун #Культурабажыңы #Шынсолун #Тыва #Тывамедээ #Тывадыл #Тува #Tuva #TMG #Tuvanews
