«Кадык камгалалы» национал төлевилел
“Кадык камгалалының бирги звенозун чаартыры” регион программазының күүселдези-биле, бо чылын Тывага ам-даа чеди фельдшер-акушер пунктуларын (ФАП) база ийи эмнелге амбулаторияларын тудар. Эркен чылын “Кадык камгалалы” национал төлевилел-биле республикага 27 ФАП-ты туткан.
Ыраккы Мөңгүн-Тайга кожууннуң Тоолайлыг, Барыын-Хемчиктиң Бижиктиг-Хая база Хөнделең, Чөөн-Хемчиктиң Хөндергей база Чыргакы, Кызыл кожууннуң Шамбалыг, Каа-Хем кожууннуң Бүрен-Хем суурларга чаңгыс хевирниң ФАП-тарын, Бай-Тайганың Бай-Талга база Чөөн-Хемчиктиң Чыраа-Бажынга эмчи амбулаториязын тудар.
Тываның кадык камгалал яамызы чеди ФАП-ты база ийи амбулаторияны 224 хонук иштинде тудар күрүне керээлерин чарган. Бөгүнде сес объектиниң тудуг участоктарында геологтуг-геодезия шинчилел ажылдары кылдынган, тос объектини тударынга чөпшээрелди алган.
Муниципалдыг тургузуглар чагыргалары кудук казар, инженер хандырылгазының техниктиг ажылдарын кылдыртыр, чырык четкизинче кабель шөйер ажылдарны бодунга хүлээнир.
Бүрен-Хем, Бай-Тал, Шамбалыг суурларда тудуг таваа салыр дээн ышкаш, чер ажылдары кылдынган. Бижиктиг-Хая, Чыраа-Бажы, Тоолайлыг суурларда ажылдар ам эгелээр.
Бижиктиг-Хая, Бүрен-Хем, Шамбалыг, Чыргакы, Хөнделең, Хөндергей суурларже тудуг ыяштарын эккээр керээлер бар.
Тываның Кадык камгалал яамызының административтиг-ажыл-агый эргелелиниң директору Урана Монгуш керээлер күүселдези үезинде болдунмайн баарындан хөлзеп турарын, чүге дизе “Алтай-лес” КХН бир ФАП-ка-ла дээш ыяшты тырып кылырынга 1,5-2 ай үнерин чугаалаан. Ынчалза-даа чагыг күүседикчилери тудуг материалдарын оон кыска үеде кылыптарын аазаан. Херек тудуг материалдарының бирги кезээ сентябрь төнчүзүнде келир.
#Тывачазактыңпарлалгаалбаны #Кадыккамгалал #Националтөлевилел #Тыва #Тува #Тувамедиагрупп #Тывадыл #Тывамедээ #Tuva #Shyntuva
