Россияның Президентизи Владимир Путин Тываның Баштыңы Владислав Ховалыгны Күрүне Чөвүлелиниң составынче киирер дугайында ноябрь 15-те үнген № 653 чарлыкка ат салган. Оон аңгыда, ук чарлык ёзугаар Күрүне Чөвүлелиниң составынче өске-даа область, крайларның болгаш регионнарның баштыңнары болгаш муниципалдыг тургузугларның удуртукчулары кирип турар.
Күрүне Чөвүлели дээрге аңгы-аңгы чаданың эрге-чагырга органнары-биле кады ажылдаар, Россияның иштики база даштыкы политиказының кол угланыышкыннарын тодарадыр, чурттуң социал-экономиктиг айтырыгларын шиитпирлээр Конституция, үндезин хоойлуда айыткан күрүне органы болур. Ооң составын чүгле Россияның Президентизи хевирлеп тургузар.
Президентиниң шиитпири-биле Күрүне Чөвүлелиниң составынче Күрүне Думазында фракцияларлыг политиктиг партияларның болгаш тус черниң эрге-чагырга органнарының төлээлери кирип болур.
Тываның Баштыңы-биле кады Күрүне Чөвүлелиниң составында 11 кижи, оларның аразында Президентиниң Сибирь Федералдыг Округта бүрүн эргелиг төлээзи Анатолий Серышев база кирип турар.
