Тываның Чазааның аппарат хуралынга өрттер талазы-биле оперативтиг байдалды сайгарып чугаалашкан.
Россияның ОБЯ-ның Тыва Республика талазы-биле кол эргелелиниң медээзи-биле, сөөлгү неделя дургузунда республиканың девискээринге 11 арга-арыг болгаш хову-шөлдер өрттери бүрүткеттинген. Ол дээрге Бай-Тайга, Сүт-Хөл, Чөөн-Хемчик, Чеди-Хөл, Каа-Хем, Таңды база Тожу кожууннарның девискээрлеринге өөскүп үнген өрттер-дир. Регионнуң удуртукчузу Владислав Ховалыг харыысалгалыг ведомстволар удуртукчуларынга арга-арыг өрттеринге буруулуг кижилерни илередип тывар талазы-биле ажылды күштелдирерин дааскан.
Владислав Ховалыгның бодалы-биле алырга, арга-арыгда өөскүп үнген өрттер дугайында болгаш аңаа буруулуг кижилерниң ат-сывын өөредиг болур кылдыр чонга чарлаар ужурлуг. Республиканың удуртукчузу өрт өөскүдүкчүлерин тыпкаш, тудар талазы-биле ажылга тус черниң эрге-хоойлу органнарын демнежип ажылдаарын дилээн.
— Өрттерниң өөскүп үнер чылдагааны хөй кезиинде кижилерниң буруузундан болуп турар. Кывыскан от, тырткан таакпы артыы азы өжегерээн кылып турар үүлгедиглер арга-арыгның, кайгамчык чараш черлерниң узуткаттынарынга, оон кедерезе чурттакчылыг черлерниң айыыл чок чоруунга айыылды чедирип борлур — деп, ол чугаалаан.
Ооң-биле чергелештир арга-арыгга айыыл чок чоруктуң чурумун сагыыр дугайында чурттакчы чон аразынга информастыг-тайылбыр ажылдарын идепкейлиг чорудар ужурлуг. ТР-ниң Арга-арыг ажыл-агый яамызынга, ооң ведомствозунда организациялар база тус черниң бот-башкарылга органнары-биле кады ол ажылды күштелдирерин дааскан.
Бо чылдың январь 1-ден тура арга-арыг өрттери-биле демисел чорудар тускай техника болгаш транспортту мониторинг херекселдери — «ЭРА-ГЛОНАСС» спутник навигация системазы-биле дериир талазы-биле негелделер күш кирген. Апрель 5-тиң байдалы-биле спутник навигация системазын 14 тускай техникада салган, ам-даа 31 тускай техникага система салыр керээлерни чарган дээрзин арга-арыг ажыл-агыйы болгаш бойдус ажыглалының сайыды Григорий Ондар илеткээн.
Регионнуң арга-арыг ажы-агый яамызының удуртулгазынга арткан 106 өрт техниказынга система тургузарын хандырарын дааскан.
«Боттары ужар авиация системалары» национал төлевилелге киришкеш, Тываның арга-арыг камгалалы өрттүң өөскүп үнген черин ырактан илередиптер «Геоскан 801» деп боттары ужар 13 аппаратты алган. Амгы үеде Арга-арыг ажыл-агый яамызы боттары ужар авиация системаларын ажыглаарынга чөпшээрел документилер алыр ажылды чорудуп турар.
Арга-арыг ажыл-агыйы болгаш бойдус ажыглалының сайыды Григорий Ондарның дыңнадыы-биле, арга-арыг өрттериниң байдалы күштелгени-биле ведомство чоокку үеде республикага өртке удур онза байдалды чарлаарын саналдап турар:
— Барыын кожууннарга өртке удур онза байдалды чарлаар ужурга таваржып тур бис, ол дээрге Бай-Тайга, Сүт-Хөл, Чөөн-Хемчик база Барыын-Хемчик кожууннарга арга-арыг кирерин хорууру-дур. Апрель 20-ден бүгү республиканың девискээринге онза байдалды чарлаарын планнап тур бис. Чүге дизе часкы үеде арга-арыг болгаш ландшафт өрттериниң 100 хуузу кижилерниң буруузу-биле болуп турар.
Бистиң корр.
Чурукту интернеттен алган
“Шын” №13 2025 чылдың апрель 10