Каа-Хем кожууннуң Бояровка суурда чаа Культура бажыңы немешкен. 2021 чылдан тура Тываның суурларынга «Сорунза» губернатор төлевилели-биле 14 объектини туткан.
Төлевилел бичии суурларның культурлуг инфраструктуразын чаартырынче угланган дээрзин сагындыраал, ында клубтар ол ажыл-чорудулгага таарышпас оран-саваларда турар, кажан-даа боттарының тудуглары турбаан. Чаа Культура бажыңын чаңгыс аай хевирде туткан – ол дээрге 240 дөрбелчин метр ниити шөлдүг 120 олуттуг оран-сава-дыр. Тудугну алды ай хире үеде тудар.
Губернаторнуң эгелээшкининиң негелделери-биле алырга, эрге-чагырга тус чер чагыргазының объектилер тудуунга чарыгдалдарының чамдыызын эгидер. Ооң-биле чергелештир чаа объект тудуунга тус черниң чурттакчылары албан киржир.
Бояровканың Культура төвүнүң ажылдакчылары «Культура» национал төлевилел-биле 2022 чылда чаа тудугну тудар мурнунда, суурнуң спорт залынга ажылдап турганнар. Боттарының оран-сава чогу оларның ажылдаар шинээн элээн кызыгаарлаан. Владислав Ховалыгның деткимчезиниң ачызында суурда амгы үениң албан черин тутканы тус черниң культуразын хөгжүдүп, чаа чадаже үнүп кээринге чурттакчылар бүзүреп турарлар.
Республика Чазааның Даргазының оралакчызы Орлан Сарыглар Тываның Баштыңының өмүнээзинден өөрүшкүлүг болуушкун-биле бояровкажыларга байырны чедирген. Оон аңгыда, Тываның Культура яамызының, ТР-ниң Дээди Хуралының (парламентизиниң) төлээлери база Каа-Хем кожууннуң удуртулгазы Культура бажыңының байырлыг ажыдыышкынынга киришкен.
«Сорунза» губернатор төлевилели үениң аайы-биле хөгжүп, нептерээнин демдеглээри чугула: ооң мурнунда төлевилел-биле чүгле чаа культура төптерин тудуп турган болза, бо чылын «Сорунза» төлевилел-биле Чеди-Хөл кожууннуң төвү Хову-Аксы суурга библиотека тудуун бир-ле дугаар эгелээн. Тус черниң ном саңы, 1969 чылда туткан тус черниң Культура бажыңының бичии өрээлинде. Ол үргүлчү көжүп-ле турар.
Библиотека албан чериниң коллективи 2022 чылда алган грантызы-биле амгы үениң дериг-херекселдерин, номнар фондузун чаартып, модельдиг библиотека кылдыр эде чаарттынган. Губернаторнуң төлевилелиниң ачызында чыл төнчүзүнде ол амгы үениң чараш библиотеказын алыр. Бо хүнде ында тудуг ажылдары дооступ турар.
Келир чылын «Сорунза» губернатор төлевилелиниң күүселдези уламчылаар.
Бистиң корр.
“Шын” №95 2024 чылдың декабрь 11