2020–2023 чылдарда «Социал керээ» программазынга Тываның 15 544 чурттакчызы киришкен. 4 чыл дургузунда оларга ниитизи-биле 1 млрд 886,6 сая рубль акша дузаламчыны көргүскен.
Эвээш орулгалыг өг-бүлелер болгаш хамаатылар дөрт аңгы угланыышкынга социал керээ-биле дузаламчыны алганын сагындыраал: ажыл дилеп-тыварынга, бодунуң хууда ажыл-херээн ажыдарынга, хууда дузалал ажыл-агыйын хөгжүдеринге, амыдыралдың берге байдалын ажып эртеринге.
Республиканың чурттакчылары колдуунда-ла ажыл дилеп-тыварынга социал деткимче дузазын ап турарын эрткен чылдарның практиказы көргүскен. 2023 чылда чонну ажылга хаара тудар төптер таварыштыр ажылга тургустунар дээн 1309 кижи 9 айның дургузунда пособиени алган. А эде өөренип алырын күзээн кижилерге өөредилге-биле холбашкан чарыгдалдарын дуглаарынга 30 муң рубльди төлеп, хереглелдиг мергежилдеринге өөреткен.
Бодун ажыл-биле хандыртынар социал керээ-биле бир муң ажыг ажыл чок хамаатылар бодунуң бизнезин ажыдар аргалыг болган. Ажылга хаара тудар керээге бодаарга, бо таварылгада элээн улуг – 350 муң рубльдиң деткимчезин хары угда бээр. Бодун ажыл-биле хандыртынарынга деткимче көргүзери эң дээштиин бадыткаан – бизнес организастаарынга керээ чарган хамаатыларның чүгле 3-тен эвээш хуузу шыдавайн, ажыл-херээн кагган.
Чыл санында программаның бир муң хире киржикчилери хууда дузалал ажыл-агыйын эгелээринге керээни чарып турарлар. Оларга мал-маган, үрезиннер садып алырынга 200 муң рубльди керээ езугаар бээр. Социал керээ киржикчилеринге боттарын аъш-чем-биле хандырар арганы берген. Республикада амыдыралдың берге байдалында таварышканнарга 70 муң рубль чедир деткимче бээри база эки хемчег – чүгле 2023 чылда Тываның 540 чурттакчызы ону ажыглаан.
Бистиң корр.
“Шын” №73 2024 чылдың сентябрь 25
